Shillong, Naiwieng 27: U Symbud Myntri Rangbah ba khmih iaka tnat Transport u Bah Sniawbhalang Dhar u la pynbna ba ki karkhana dewbilat ki la mynjur ba kin ai ia 120 tylli ki trok trai Jylla man ka sngi ba kin kit dewbilat, ha kaba 100 tylli ki trok kin sdang kit naduh ka 28 tarik Naiwieng bad 20 tylli kin sdang naduh ka 1 tarik Nohprah 2025.
Ïa kane ka rai la shim haka jingïalang ba la pynlong bad ka Jaintia Hills Cement Manufacturers Association (JHCMA), Jaintia Hills Truck Owners & Drivers Association (JHTODA), East Jaintia Hills Truck Owners & Transporter Association (EJHTOTA) bad Meghalaya Commercial Truck Owners & Drivers Association (MCTODA).
Ki kynhun jong ki trok kila dawa ba dei ban ai kit dewbilat nyngkong eh iaki trok trai Jylla daka pynkiew iaka jingdon ki trok trai Jylla na ka 80 tylli sha ka 120 tylli man ka sngi.
“Mynta ka sngi, ki karkhana dewbilat ki la mynjur ban ai kamai ia 120 tylli ki trok trai Jylla manla ka sngi katkum ka jingdawa jong ki Association jong ki nongñiah bad trai trok.
Naduh lashai ka sngi, kata 28 tarik Naiwieng, 100 tylli ki trok kin sdang ban kit dewbilat na ki karkhana bad sa 20 tylli ki trok kin sdang kit dewbilat naduh ka 1 tarik Nohprah 2025” ong u Bah Sniawbhalang.
Ha kaba iadei bad ki dor jong ka bai kit sha bar ka Jylla, ka Sorkar ka la ioh ia ka jingai jingmut na ka liang ka tnat Ain kaba ong ba kam lah ban buh iaka dor na ka bynta kiwei pat ki Jylla.
“Katkum ka ain, ka Sorkar Meghalaya kam lah ban buh dor iaka bai kit dewbilat sha kiwei pat ki Jylla” ong u Bah Sniawbhalang haba sot ia ka jingai jingmut da u Advocate General ka Jylla.
U Symbud Myntri Rangbah u la bynrap ruh ba ka dor kit dewbilat hapdeng ki Jylla kan long katkum ka iew ka hat, katba ka dor bai kit hapoh ka jylla la buh beit T.9 shi metric ton/km. “Hynrei ki karkhana dewbilat kila pynpaw ba ka dor T.9 ka long kaba rem bad kaba lah ban wanrah ia ka jingkiew dor jong ka dewbilat” u la ong.
“Ha ka jingïalang ki karkhana dewbilat ki iai ong iaki Association baka dor bai kit ba T.9 ka long kaba heh palat. Nga la kyntu iaki ban ïakren pynbeit para maki” u la ong.
Nalor kane u la pyntip ruh ba ma u ha ryngkat bad u Symbud Myntri Rangbah ba khmih iaka tnat kam pohiing (Police) Bah Prestone Tynsong ki la iakren halor ka mat kaba la kynnoh ba ka dor dewbilat ka long kaba rem hapoh ka Jylla.
“Ngin sa khot ia ka jingialang bad ki karkhana dewbilat ban iakren halor ka dor dewbilat ha Jylla ” u la pyntip.
