Thep u Pynshailang haduh 4 kol ia ka MLP
Shillong, Naiwieng 27 : U Pynshailang Lyngkhoi, u rang ialehkai ba shakhmat ka MLP-FT ula pynjop marwei ia ka kynhun ha ka jingiakhun pyrshah ia ka Umlyngka da ka jinglah ban thep haduh 4 kol, ha ka jingiakhun jong ka lympung Shillong Sport Association Champions Cup 2025, ba long ha ka sngi Palei ha Polo.
Ia kine ki saw tylli ki kol, u Pynshailang u la ioh ba un thep ha ka minit kaba 53’, 55’, 57’, 70’. Kine ki kol kila wan hadien ka jingshah tam ha ka Umlyngka kaba la ioh pynkhih ia ka jar ba nyngkong lyngba ka penalty ha ka minir ba pynjlan ia ka por ialehkai (45+2) jong ka kylla Step. Ia kane ka kol la thep da u Anthony Kharkongor.
Haba phai sha ka jingiakhun, ka kylla step hi ka long ba ka sur ialehkai ka Umlyngka ka pyrshang artylli ki buit ialehkai ki jong ka, kawei ka long ba kan pynskhem beit ia la ka kut ialehkai (defend) bad ha ka juh ka por ba kan pyrshang ruh artad ban nion shakhmat (attack), kaba kane ka sur ialehkai hi, ka la pynshitom jingmut bha ia ka kynhun ialehkai ka MLP FT.
Hynrei haba wan ban bteng ia ka kylla miet, ka MLPFT, kaba la shem bad iohi ia kane ka buit ialehkai jong ka Umlyngka, ka la kyntiew ia ka buit ka bor ialehkai jong ka, bad lyngba ka jingtbit ka jong u Pynshailang bad ka jinglah ban ia mir bha hapdeng baroh ki player ha madan, kala pynlong ia ka MLPFT ba kan wanphai sha ka lynti ka jingjop na kane ka jingiakhun.
Ha kawei pat ka jingiakhun, ka Langsning FC kala khur ia ka jingjop da ka jingpynliem ia ka Mylliem Lum da 2-0 kol.
Ia ki artylli ki kol ki jong ka Langsning, la thep ia ki da u Richie Kharbani (36′) bad u Donlad Diengdoh (67′), kaba kum ka kynhun ka la hap ba kan kham trei shitom bad durut tyngeh, namar ka kynhun ialehkai jong ka Mylliem Lum, ka la mih madan da ka sur iakhun ban nym shah jem.
Da kane ka nam jop, ka Langsning FC ka la ioh ba kan khur mynta 6 point, bud pat sa ka MLPFT kaba la khur 3 point, ka Mawkasiang bad ka Mylliem Lum mar shi point, katba ka Umlyngka kam shim pat la ioh khur point.
Lashai pat ka sngi, ka jingiakhun naka bynta ka Group B ka long hapdeng ka Mawlynrei pyrshah ia ka Shillong Lajong FC ha ka por 1 baje nohphai sngi, bud pat sa ka jingiakhun hadpeng ka Mawkriah West pyrshah ia ka Laitkyrhong kaban long ha ka por 4:30 nohphai sngi.
