Shillong, Naiwieng 25 : Ka Iingkashari Meghalaya High Court kala pynsangeh shuwa ia ka jingshong bishar ia ka mukotduma ba iadei bad ka jingtyrwa ban pynkynriah ia ki 342 tylli ki Longiing ka Them Metor, na Them Iew Mawlong.
Halor ka jingkyrpad jong ki liang mamla, ka Single Bench ba khlieh da u Justice B Bhattacharjee ha ka hukum ba pynmih ha ka 19 tarik Naiwieng, kala bthah ba ia kane ka kam ban buh bishar biang hadien lai taiew “ban ap ia kaei kaba mih na ka mukotduma ba don jingiadei, kaba dang sahteng ha ka Iingkashari Division Bench ka High Court”.
Ha ka 17 tarik Risaw, ka Division Bench kala shah ia ka Sorkar Jylla bad ka Harijan Panchayat Committee ba kin wad ia ki lad ki lynti ban iapynbeit ia kane ka kam lyngba ka jingiakren.
“…Ngi kyrmen bad shaniah ba hapoh kane ka por ba kdew haneng, ka jingmut kaba bha kan jop bad ki liang mamla kin ialeh shitom ban pynbeit da ka jingiasngewthuh jingmut lang ia kane ka jingiakynad” ong ka Division Bench.
Lah ban kdew, u Symbud Myntri Rangbah ba khmih ia ka Tnad Urban Affairs Bah Sniawbhalang Dhar ha ka 10 tarik Risaw, ula pyntip ba ka Sorkar kala dep ithuh ia ki katto katne ki jaka na ka bynta ban pynkynriah ia ka Them Metor.
