Shillong, Naiwieng 24 : Ka Confederation of Meghalaya Social Organisation (CoMSO) kala dawa ia ka Sorkar Jylla ba kan shim mardor kat kum ka ain ia ki sienjam ha kaban tehlakam ia ka jingwan rung ki briew na West Bengal bad Assam, kiba don hapdeng ka huri hura na ka jingleh ia ka Special Intensive Revision (SIR) ha kine ki Jylla.
“Namar kata, ngi dawa ban shim mardor ia ki sienjam kat kum ka ain, da kaba pyntreikam ia ki kyndon ain ban pyrrkhing bad haba donkam, ban khang ia ka jingwan rung ki briew sha Meghalaya tad hadien ka jingpyndep ia ki jingpynshisha bad tip ba kim dei kiba buh jingma” ong u Chairman ka CoMSO bad President ka HYC Bah Roykupar Synrem ha ka kyrwoh ba pynlait ha ka sngi Nyngkong.
Ka CoMSO kala dawa ruh ban pynrung kyrteng khlem pep, pynshisha ia ka kyrteng bad jaka sah, bad baroh ki kot ki sla jong ki briew ba wan rung sha Jylla na ki thain kiba shah ktah ha ka SIR.
Nalor kane, kala dawa ruh ba dei ban buh ia ki Pulit bad ki bor District ha baroh ki jaka rung, aibor ba kin pyntreikam ia ki ain kiba lah ban pyntreikam, ban pynmih mardor ia ki jingpynbna lane hukum na ka Sorkar, pynshai bha ia ki sienjam ba lah ban shim da ki bor Sorkar, bad don ka jingiatreilang bad ki bor Sorkar ka Assam bad West Bengal khnang ban lah pynshisha bad khanglad ia ki briew ki bym don kot don sla na kine ki jylla sha Meghalaya bad kiwei kiwei.
U Bah Roykupar ula maham ruh ba ka jingioh rung ki briew na kine ki Jylla kan buh ha ka jingma ia ka jingshngain, ka jingpynthut ia ka suk ka sain bad ka hok jong ki nongshongshnong ka Meghalaya.
U Bah Roykupar ula ban jur ba ka Sorkar Jylla ka dei kaba la iohbor da ka ain bad ka don ka kamram kat kum ki kyndon ain bapher bapher ban pyrrkhing ia ka jingrung ki briew, ban talasi ia ki kot ki sla ban pynshisha, bad pyntreikam ia ki lad ki lynti kiba donkam ban khanglad ia ki jingpynthut ia ka shongsuk shongsain.
Hynrei ula ong pat “Haba khmih ia kine ki jinglong jingman, ka jingbym leh eiei lane ka jingpynslem ban leh eiei ka lah ban lam sha ka jingbym lah treikam ki bor synshar ka ban ktah jur ia ka jingshngain bad ka synshar ain”.
“Kane ka dei ka kam ba iadei bad ka jingshngain u paidbah bad ka jingkitkhlieh kat kum ki lynti ka ain. Ki paidbah ka Meghalaya ki khmih lynti ban iohi ia ki sienjam kiba sted, kiba skhem bad kiba shongain” ula bynrap.
 kala dawa ia ka Sorkar Jylla ba kan shim mardor kat kum ka ain ia ki sienjam ha kaban tehlakam ia ka jingwan rung ki briew na West Bengal bad Assam, kiba don hapdeng ka huri hura na ka jingleh ia ka Special Intensive Revision (SIR) ha kine ki Jylla.){kind=link}