Iadonbynta haduh 2000 ngut ki samla ka jylla
Shillong, Naiwieng 22: Ka Meghalaya kala kynjoh sha uwei pat u mawmer ha ka jingkamai lyngba ka jingpyndep ia ka jingshna ia ka phlim hapoh jongka
Meghalaya Film Tourism Policy 2025.
Ka phlim Telugu kaba la ai kyrteng ‘Baa Baa Black Sheep’, kaba la shna da u Guni Manchikanti bad pynmih da ka Chitralayam Studios, kala pynkut noh ia ka jingring dur baroh kawei hapoh ka jylla, ha kaba man la ki khyllipmat jong kane ka phlim la ring ha ki jaka kiba itynnad jong ka Sohra.
Ia kane ka phlim la ring dur tang hapoh ka 25 sngi bad lyngba kane ka projek kila don haduh 2000 ngut ki samla ka jylla kiba la iadonbynta ha ki bynta ki bapher bapher, kaba long ruh ka jingiohkam kaba heh duh ha kaba iadei bad ka jingpyndonkam ia ka sap ka phong kaba pynskhem ruh ba ka Meghalaya mynta kala sdang ban long kum ka jaka ban shna ia ki phlim kiba paka.
Ka ‘Baa Baa Black Sheep’ kadei ka khana birria shaphang u riewsniew ne Gansgster, ki paralok kiba thamula, ki riewrunar bad ka jingkynrum kynram ha ka nongbah kaba la mih na ka jinglap ia ka baje kaba la jah jong u Mahatma Gandhi bad mynta kane ka phlim kala pynkhreh ban pyni noh ha ki rynsan jong ka ri.
Haba ai khublei ia katei ka kynhun, u Myntri Rangbah ka jylla u Conrad K. Sangma ula ong ba ka jingpynmih ia kane ka phlim ka pyni ia ka jingkloi ka Meghalaya ban kyrshan ia ki projek kiba heh hapoh ka ri.
“Hapoh jong ka Meghalaya Film Policy, ia kane ka phlim kaba nyngkong eh la dep ban shna pyndep. Kane kadei ka phlim Telugu kaba la ring dur hapoh jong ka 25 sngi bad 100% na ka jingring dur kala long hangne hapoh ka jylla Meghalaya, khamtam eh ha ka thain Sohra. Phin kmen ruh ban tip ba jan kumba 2000 ngut ki samla ki jong ngi kila iohkam ha ka por ba ringdur ia katei ka phlim. Nga kyrmen ba bun ki phlim kin iai mih bad ba ka Meghalaya kan kylla long kum ka jaka kaba pawnam halor kane ka bynta” ula ong.
U Producer jong ka phlim u Venu Donepudi ula iaroh ia ka jingkyrshan kaba la ai da ka jylla bad ka jingtbit jong ki kynhun ka jylla ha ka rukom treikam.
“Ka long kaei kaei kaban sah jingkynmaw, hapoh ka jingialam ka jong phi bad ki briew kiba sngewtynnad jong ka Meghalaya, ngi la lah ban pyndep ia kane ka phlim hapoh jong ka 30 sngi bad kumba 25 sngi, kaban long ruh syndon kum ka rekod” ula ong bad ka bynrap ba ia kane ka phlim yn sa pyllait ruh ha ka ktien Khasi. Ula iawer ruh ia u Myntri Rangbah ban wan ban iadonlang ha ka sngi ban pyllait paidbah ia kane ka phlim ha Hyderabad.
Ka jingkyntiew ia ka ioh ka kot lyngba ka sap ka phong bad ka kam jngohkai
Ka jingshna pyndep ia kane ka phlim ka wan ruh ha ka por ba ka Meghalaya’s Vision 2032 ka ithuh ia ka kam jngohkai bad ki bynta kiba don ia ki sap ki phong kum ka enjin kaba kongsan ban kyntiew ia ka ioh ka kot ban ialam ia ka jylla ha kaban kynjoh ia ka ioh ka kot kaba $10 billion hapoh u snem 2028 bad $16 billion hapoh u snem 2032.
Ka Meghalaya Film Tourism Policy 2025 ka tyrwa ban ai ia ka jingkyrshan pisa kaba biang, ban pyniaid ryntih ia ka jingmynjur lyngba ka Invest Meghalaya Portal bad ka don ia ka thong ban kyrshan ruh ia ki jingpynmih ia ki phlim hapoh ka ri bad kiba nabar ri.
Ka jingai Subsidy kaba haduh T.1 Klur ne 25% na ka jingpynlut pynsep kan dei tang na ka bynta ki 10 tylli ki phlim kiba wan ring nyngkong eh, ha kaba kan don ruh ka jingioh jingmyntoi shuh shuh lada ha ki projek la aikam aijam ia ki trai shnong bad ia ki kynhun, da kaba pynrung lang ia ki sur jingtem kiba pynmih na ka jylla ne ban pyni paidbah lyngba ka Hello Meghalaya kaba dei ka rynsan OTT jong ka jylla Meghalaya.
