Shillong, Naiwieng 22 : U Myntri Rangbah ka Jylla Conrad K Sangma ha ka sngi Thohdieng, ula leit iuhkjat ha Umsning bad iashimbynta ruh ha ka jingialang jong ka Umsning Town Durbar kaba la pynlong ha Umsning Auditorium.
Kiba la iadonlang ki kynthup ia u MLA ka Umsning Dr Celestine Lyngdoh bad MLA ka Mawhati Bah Charles Marngar.
Haba ai jingkren ha ka jingialang,u Myntri Rangbah ula ong ba ka dei ka jingthrang jong ka Sorkar ban iakynduh ia ki paid bah bad ban peit hi dala ki khmat ia ki jingeh bad ki jingdonkam jong ki paidbah ha manla ki shnong.
“Ia ki jingdonkambad ki jingeh lah ban iakren ha ki kamra jong ki Ophis hynrei ngi wan hangne mynta namar ngi sngewkhia shisha bad ban iohi bad sngap na phi ki paidbah hi ka dei kaei kaei kaba phim lah ban leh da kaba shu shong jingialang ha Secretariat ne ha ki Ophis” ula ong.
Shuwa ka jingialang, u Myntri Rangbah ula leit jngoh ia ka madan ka Umsning Sports & Cultural Club ha kaba ki nongkitkam ka Club kila pynsngew ia ka jingangnud ba sahteng ban shna ia ka madan ba paka namar ka madan ka dei ka bynta ba kongsan ia ka met ba shait ba khlain bad ka kolshor.
“Kane ka madan ba 12 acre ka dei kaba la ai sngewbha ha u snem 2001 da u Bah Nehlang Lyngdoh kala shakri ym tang ia ka shnong Umsning hynrei ia ki hynriew tylli kiwei pat ki shnong ba marjan hynrei watla ka por kala iaid la arphew saw snem, hynei ka madam kam pat don satia ia ki jingdonkam ba kongsan” ong ki Nongkitkam ka Club.
U Myntri Rangbah ula pyntip ia ka jingialang ba ula dep bthah ia ka Tnad Sports ba kan wanrah ia ka plan bad ka jingmang tyngka ban kyntiew kyrdan noh ia kane ka kam. “Nga lah ban sngewthuh ba katno ka long kongsan kane ka madan ia ki briew jong ka thain naba kat haba nga iaid lyngba ka Umsning Bypass, nga ju iohi beit ia ki jingialehkai phutbol ne kino kino ki jingialehkai, kaba pyni ia ka jingieid jong phi baroh ha ki kamialehkai…namar kata, nga kular ia phi ba ngin shimkhia ia ki jingdonkam jong kane ka madan ha ki bynta bynta” ula ong.
U Myntri Rangbah ula pyntip ruh ba ka Sorkar kan sa pyntrei noh mar mar ia ka jingker kynroh ia kane ka madan, ka jingshna ia ki VIP gallery bad ki painkhana ha kane ka madan.
Ha ka jingialang jong ka Town Dorbar, ki Nongkitkam ka Durbar kila pynsngew hakhmat u Myntri Rangbah ia ki jingdon kam ba kyrkieh jong kane ka Sor khamtam hapoh ka Iew.
“Nga sngewkmen ban pyntip sha phi ba ka jingtyrwa ban shna ia ki nala hapoh ka Iew kala don bad ka pisa ba T.1.5 klur la mang na ka bynta kane ka kam” ula ong haba pyntip ba un mang pisa T.20 lak na ka Chief Minister’s Special Development Fund na ka bynta ban pynieng ia ki streetlight nalor ka pisa ban shna pynbha ia ki lynti iaid.
Ha ka jingialang, ki Nongkitkam ka Seng Kynthei kila pynpaw ia ka jingsngewkhia halor ka jingbym poi ka um hapoh ka Jal Jeevan Mission kaba la wanrah ia ka jingeh ia ka jingim jong ki ba manla ka sngi. U Myntri Rangbah ula pyntip mardor ba un sa lum ia ka jingialang mar mar ha ka sngi ba bud bad ka PHE, u DC ka Ri-Bhoi bad East Khasi Hills ban iakren ia ki jingeh kiba lam sha ka jingbym lah pynpoi um nalor ban wad ia ki lad ki lynti kumno ban weng ia kane ka jingeh.
Kiwei pat ki jingsngewkhia bala pynsngew da ki nongkitkam ka Durbar ki kynthup ia ki Shnong Shnong, ka jingpyn iabynta bad jingbret niut, ki jaka pynieng kali bad kiwei kiwei.
Ha kane ka sngi la pynkup burom ruh ia ki samla pule ba pass bha bad ki nongialehkai kiba wanrah nam ia ka Jylla bad ka dong ka thain. “Kum ka dak ka jingsngew burom bad jingithuh, nga kwah ban ai sha ki ia ka song pisa ba mar T.20,000 na ka Chief Minister’s Special Grant” ula ong. Ula pynbna ruh ia ka song jingiarap na ka bynta ki skul jong ka thain Umsning ban thied ia ki tiar put tiar tem.
