Shillong, Naiwieng 18 : Ki Pulit kila pynngat ha ka case pyrshang ban pyniap (attempt to murder) pyrshah ia u Security Guard uba tynrah da ka kali ia ki arngut ki samla pule ka North Eastern Hill University (NEHU) hynnin ka janmiet sngi Nyngkong.
Ki Pulit kila pyntip ruh ba une u Security Guard u dei uba trei ha North Eastern Indira Gandhi Regional Institute of Health & Medical Science bad la tip kyrteng ia u da u Permen M Sangma.
Kat kum ka jingiathuh u Superintendent of Police ka East Khasi Hills Bah Vivek Syiem, u Permen u dei u nong trei jong ka kompani kaba peit lang ia ka jingpahara ha NEHU bad ula sah ha Barrack jong ka kompani kaba don ha phyllaw ka NEHU.
“Ngi la kem ia une u briew ba donkti ha kane ka jingjia aksiden. Ngi la register case pyrshah ia u bad la kurup ruh ia ka kali” ong u Bah Vivek.
Haba kylli, u SP u iathuh ba ki Pulit kila pynngat ia une u briew hapoh ka kyndon 109 jongka Bharatiya Nyaya Sanhita (BNS)-kaba dei ka kyndon ba thmu ban shim ia ka jingim briew.
Kane ka jingjia kala jia ha ka por 7:30 baje janmiet ha Gate No 2 jong ka NEHU ha kaba ka kali u Permen kala leit tynrah beit beit ia ki arngut ki samla pule ka Tnad pule Chemistry, kiba la mynsaw jur bha ha kane ka jingjia.
Ia kine ki arngut ki samla pule – Daritngen Pohdukhei bad Stephanie Shadap – la pynkit mar mar sha Hospital bad mynta ki don hapoh ka jingsumar ha ICU.
Kat kum ka kaiphod leh test, u Permen ula buaid ha kane ka por ba jia kane ka jingjia bad ka jingdon ka kyiad ha ka met jong u, ka dei kaba la palat ia u pud ban niah kali.
“Ngin sa ialam tian bishar ia u sha Iingkashari mynta ka sngi bad ngin pan por ban pynlong ia ka jingtohkit” ong u Bah Vivek.
Ki Pulit ki dang ap ruh ia ka kaiphod u Motor Vehicle Inspector (MVI) ban pynthikna la ka don ne em ka jing thut ha ka kali, kaba lam sha kane ka jingjia.
U SP ula pynpaw ba kane ka jingjia ka dang donkam ia ka jingtohkit ban pynthikna ia ki daw ha lyndet jong kane ka jingjia.
 pyrshah ia u Security Guard uba tynrah da ka kali ia ki arngut ki samla pule ka North Eastern Hill University (NEHU) hynnin ka janmiet sngi Nyngkong.){kind=link}