Plie u CM ia ka Building ka Jengjal Police Station
Shillong, Naiwieng 17 : U Myntri Rangbah ka Jylla Conrad K Sangma ula pyntip ba ka Jengjal, West Garo Hills, kan sa ioh noh shen ia ka Kad Liengsuin.
U Myntri Rangbah ula pyntip ia kane haba plie ia ka Building thymmai jong ka Jengjal Police Station ha ka sngi Nyngkong ha ka jingiadonlang ka Director General of Police Idashisha Nongrang, u Superintendent of Police ka WHG Abraham T Sangma, u Deputy Commission Vibhor Aggarwal, Chairman ka MIDC James K Sangma bad kiwei kiwei.
Kat kum ka jingong jong u, “Ngi la dep aiti ia ka Jengjal Airport sha ka Airport Authority of India (AAI) haba sdang jong une u snem bad kila dep aiti ia ka jingmang pisa ba T.50 klur sha ka Sorkar Jylla” ong u Conrad.
“Nga kmen ban pyntip hangne ba hapoh une u bnai, ka Sorkar kan sa pynlait ia ka pisa ba T.50 klur sha ka AII khnang ba ki kam kin sdang noh ha Jengjal Airport” ula bynrap.
U Myntri Rangbah ula iathuh ruh ba hadien ka jingpyndep ia kane ka kad liengsuin, ka liengsuin ba 19 seat jong ka Air Alliance kan sa treikam na kane ka kad bad kan buh hakhmat eh ia ka jingkamai ka liengsuin na Shillong sha Tura.
U Myntri Rangbah ula pyntip ruh ba ka Sorkar ka dei peit jaka ha Jengjal ban pynlong ia ka madan ba shirta na ka bynta ban pynlong ia ki tamasa kiba heh.
Haba kren halor ka Building jong ka Police Station, u Conrad ula ong “Ka Jengjal Police Station ka dei kawei na ki Police Station ba biang tam ha ka Jylla kaba don ha ka jaka kaba kongsan bad ba biang bha, ka ban pynsuk ym tang ia ki paidbah hynrei wat ia ki Pulit ba kin pyndep iala ki kamram”. Ula ai khublei ia u Nokma bad ki paidbah ka thain kiba la aiti sngewbha ia ka jaka ban shna ia kane ka Police Station.
Kane ka Police Station-kaba la pynbna ha u 2017, kala treikam na ka Iingdieng ba shu shim wai haduh mynta.
“Kane ka Police Station ka dei kaba la tei kat kum ki kyndon bala buh da ka Sorkar India bad ngin pynthikna ba yn kyntiew kyrdan noh ia baroh ki Police Station ha ka Jylla, pynbna lane shna kat ki kyndon bala buh” ula ong.
Ula pyntip ruh ba shuwa kine kiei kiei, ka jingmaramot lane shna pynbna ia ki Police Station ka dei ka kam kaba jyrwit jyrwat bha namar ki Police Station ki hap ap ia ka jingmang pisa ka Sorkar wat ia I kam bar it eh kum ka kam airong.
“Mynta da ka Police Infrastructure Renovation Fund, ki SP ki lah ban pyntrei ia ki kam maramot ia ki Police Station khlem da ap ia ka jingpyllait pisa na ka Sorkar” ula ong. U pyntip ba lyngba kane ka song pisa, bun tylli ki Police Station kila dep ia ka ban maramot.
Kiwei pat kiba la ai jingkren ki kynthup ia ka DGP Kong Idashisha Nongrang, Chairman ka MIDC James K Sangma, SP ka District Abraham T Sangma bad kiwei kiwei.
