Guwahati, Naiwieng 13: U Myntri Rangbah ka jylla Assam Himanta Biswa Sarma ha ka sngi Palei u la sdang ka jingkynthoh sain pyrthei kaba tyngeh bha, da kaba kynnoh ba khlem ka BJP ha ka bor, “baroh kawei ka jylla Assam kan jin da lah shah pyniaid ha ki jaitbynriew Miya.”
U Sarma u la kynthoh ba ki lai ngut ki nongialam ba paw khmat bha ka liang pyrshah ba kynthup ia u Lurinjyoti Gogoi, Akhil Gogoi bad u Gaurav Gogoi ki dei kiba iajan bad kyrshan bha ia ki jaitbynriew Miya.
“Kine ki lai ngut ki Gogois—ia u Lurinjyoti, u Akhil bad u Gaurav—kidei ki nongkyrshan ba radbah jong ki Miya, ym ki nongkyrshan jong ki Gogoi,” u la ong.
Haba kren sha ki lad pathai khubor, u Myntri Rangbah u la maham tyngeh ba lada ki weng noh ia ka BJP na ka bor kin sa mad ia ka jingma ba khraw.
“Lada ka BJP kam don shuh ha ka bor, baroh kawei ka Assam da kaba sdang na Dispur, kin sa shah shimti noh ha ki Miya.Kito kia kren pyrshah ia ka BJP ha kawei ka sngi kin sa babe namar ba ngi ieng kum ka kynroh hapdeng ki Miya bad ki trai ri trai muluk,” u la ong.
Shuh shuh u la kynnoh ba ki dkhot jong katei ka jaitbynriew khlem jingtieng ki post ha ki rysan social media wat la ka BJP ka don ha ka bor. “Shu mutdur kaei ba kin leh lada ka Congress kan wan ha ka bor.Kin sa shimti lut ia kiei kiei baroh” u la pynpaw.
U Myntri Rangbah u la pynmih ruh ka jingkam ka bym sngewthuh sngewthaw sha phang jong kane ka jaitbynriew, da kaba u la ong kumba 40 percent jong ka jingbun briew ki dei kiba runar.
“Ki lah ban jrongkti bad leh kynshlein ia ki kynthei, kin ot lyngkhot lyngkhai bad sa bret ia ka sha ki wah bad kata kadei ka history jong ki.Ki paidbah kidei ban sngewthuh ia kane bad kidei ban ieng ia tylli lang lane ngin ym lah ban im,” la kam u Sarma.
Shuh shuh u Sarma u la bynrap ba khlem ka BJP, ka jinglong jingman ha ka jingbun briew hapoh ka jylla Assam kan sa “kylla jur bha”.
“Ka imlang sahlang jong ki Assamese ka dei ban ïa long tylli kawei, lada kam long kumta, ki paidbah jong ka Assam kin hap ban siew ïa ka dor kaba heh ha ki por ban wan,” u la maham.
