SHILLONG, NOV 13: U Nongialam ka seng Congress u Bah Vincent H Pala ula pyntip ba kila don 67 ngut kiba phaikhmat ban pan tiket na ka congress ban iakhun ha ki 29 tylli ki Constituency ha ka Elekshon MDC jongka Garo Hills Autonomous District Council (GHADC) kaban sa long.
“Dang shen nga lah leit sha Garo Hills bad nga lah ong ia ki nongkitkam ka seng ba ka Meghalaya baroh kawei ka khmih bha ia ngi. Lada ka Congress ka iakhun para ma ki ban ioh tiket, kam long kaba bha hynrei lada ki iatreilang na ka bynta ka bha ka miat jong ka thain, ka don ka jingkyrmen ia ka seng” la ong u Bah Pala.
Ula ong, ba kiba bun na ki nongkitkam ha ka seng kila kular ban iatylli na ka bynta ka elekshon.
U nongialam ka Congress ula pynshai ruh ha kaba iadei bad ka jingwan phai biang sha ka seng da ki katto katne ki nongialam kiba kynthup ia u Zenith Sangma, Youth Congress President barim bad AICC Secretary ryngkat bad u John Leslee bad u Winnerson D. Sangma.
Ula pynpaw ba kumba 85 % na ki dkhot jong ka Trinamool Congress kila wan pyniasoh bad ka seng Congress ban pynkhlain ia ka seng ha kylleng ki jaka.
U Bah Pala ula ong, ba ka jingwan phai biang jong u Zenith kala wanrah ia ka jingkylla kaba bha kylleng jong ka jylla.
“Ka jingwan phai dang shen jong u Zenith Sangma bad kiwei ki nongialam kum u John Leslee bad u Winnerson D Sangma kan kyntiew shuh shuh ia ka seng ha ka thain. Kumba 85% na ki dkhot jong ka TMC kila pyniasoh noh bad ka Congress. U Zenith uba long u President barim ka Youth Congress bad AICC Secretary, ula wanrah ia ka jingshemphang ka jongu. Ngi lah rai ban wan ialam biang ia u namar ba ka Garo Hills ia mynta kam don satia ia ki MLA ne ki MDC kiba biang, hynrei tang u MP uba bunkam bha hapoh New Delhi. Nga lah leit hi dalade ban iakynduh ia u Zenith bad kyntu ia u ban weng noh sharud ia ki jingiapher na ka bynta ka bha ka miat jongki paidbah. Ula kubur ba ka jingbamsap kala long kaba jur bha bad ia kane ka jingsngew kadei kaba la pynpaw da kiba bun balang, kynthup na ki nongkyrshan na ka rilum Khasi bad Jaintia kiba mynta kila wan ban pyniasoh noh bad ka seng. Ka jingwanphai biang u Zenith mynta kala lah ban wanrah ia ka jingkylla ha kylleng jong ka jylla” ula ong.
Ula pynpaw ba kane ka sienjam kadei kaba la khmih lynti ba kan ktah jur bha ia ka NPP.
 kaban sa long.){kind=link}