Shillong, Naiwieng 12: U Myntri ka pule puthi u Bah Lahkmen Rymbui hynne ka sngi Balang ula pynbna ba ka sorkar jylla kan pynjur ia ka jingshimkhia ban tem ia ka jingjur jong ka jingiehnoh shiteng por ia ka jingpule ha ka kyrdan Higher Education bad ban pynbha iaka jinglong jingman ka kyrdan jong ka jingpule ha kylleng ki bynta jong ka jylla Meghalaya.
Haba iakren bad ki nongpathai khubor hadien bala wai ka jingialang jongka State Higher Education Council (SHEC), u Bah Rymbui ula ong ba ka Council, kaba la seng ha u snem 2018 lyngba ka Assembly Act, kadei kaba la pynkhie im ban ai jingmut ia ka sorkar bad ban peit ruh ia ka jingpyntreikam ia ki mat ban wanrah ia ka jingkylla.
“Ka mat jong ka jingjur jong ka jingiehnoh shiteng por ia ka jingpule ha ka Higher Education kadei ka mat kaba sngewkhia shisha” la ong u Bah Rymbui bad ka ong, ba ka sorkar MDA ka lah dep ruh ban kyntiew ia ki lad ban plie ia ki People’s College ha ki jaka kiba don ha ki thain nongkyndong kum ha Shangpung, Khliehriat, Nongtalang, Mawphlang, Mawsynram, Rongjeng, Patharkhmah, Umsning, Dalu bad Chokpot bad ka jingseng ia ka Captain Williamson Sangma State University bad ia ka Engineering College.
Ula bynrap ba ka jingbym biang ka kamai kajih ruh kadei kawei na ki daw bad kumta kala pynlong ia ka sorkar ban pynkiew noh ia ka Scholarship.
Ha u 2020, ka sorkar kala pynkiew ia ka scholarship ia ka Group A, B, C, D na ka T.15,000 sha ka T.35,000 bad ia ka Merit Scholarships ia ka Primary na ka T.100 sha ka T.500 bad Upper Primary na ka T.150 sha ka T.700.
Ka Chief Minister’s Scholarship Scheme, kaba la sdang mynta u snem kan nang pynduna ruh ia katei ka jingeh.
U Bah Rymbui ula pynpaw ba kila don 82.3 % jong ki samla kiba pule ha ka Klas XII kila shim ia ka Arts, da kaba pynpaw ba ka duna palat ka lad ban ioh pule ia ka Science bad Commerce. Ban shimkhia ia kane, ka sorkar jylla kala kyntiew ia baroh ki Secondary School Sorkar sha ka Higher Secondary.
U Myntri ula kdew ruh ba tang 25 college ha Meghalaya kidei kiba la ioh ia ka jingithuh na ka NAAC, katba 71 tylli ki Aided/Unaided College kim shim la ioh ia ka jingithuh.
“Kumta, ngi lah rai ban phah ia ka jingtyrwa sha ka sorkar ban ai T.1 Klur ia ka State Higher Education Council (ban kyrshan ia ki jaka pule kiba pan jingkyrshan ban ioh ia ka jingithuh na ka NAAC),” ula ong.
Ula pyntip ba ka State Level Quality Assurance Council (SLQAC) ka bym shim la treikam yn sa pyntreikam biang noh ba kan khmih bniah ia ka jinglong jingman naduh na ki Pre Primary haduh ki kyrdan jong ki University.
“Ym tang ban shu ioh ia ka jingpule hynrei ban ai iaka jingnang jingstad kaba paka ha kylleng ki bynta, naduh na ki Klas A Rit shaduh ki skulbah, kadei ka thong ka jong ngi” la pynkut u Bah Rymbui.
