Guwahati, Naiwieng 12: Ki pulit jong ka jylla Assam kila kem sa san ngut ki briew na ki district bapher bapher jong ka jylla namar ka jingthoh ha ki rynsan social media ba pynshit bad ai ding halor ka jingjia bthei bom ha Delhi Red Fort.
Kane ka jingkem kala wan khyndiat por tang hadien ba la kem noh ia u principal ba la shongthait jong kawei ka skul sorkar u Nazrul Islam Barbhuiya uba dei na Silchar halor ka jingshah kynnoh ba u la kren ban pynkhih win ha kaba iadei bad katei ka jingjia.
Kine ki briew kiba la shah kem la ithuh kum u Mattiur Rahman (Darrang), Hassan Ali Mondal (Goalpara), Abdul Latif (Chirang), Wajhul Kamal (Kamrup), bad u Nur Amin Ahmed (Bongaigaon).
Katkum ki pulit, ka jingkem kadei hadien ka jingpeit bniah ia ki kam kiba iadei bad ka online da ka jingthmu ban khang lad ia ka jingpynphriang ia ki khubor ba pynshit bad kiba ai jingiaroh ia ki kynhun lehnoh.Ki pulit ka Assam kila pynpaw ba kin leh da kaba tyngeh ia kino kino kiba pyndon kam bakla ia ka rynsan social media ban pynjur ia ka jingia klumar bad kaba pynthut ia ki paidbah.
Na ka liang u Myntri Rangbah u Himanta Biswa Sarma, haba kynthoh halor katei ka kam, u la pyniadei ia kitei ki nongshah kynnoh bad ka jingleh niam, da kaba maham ba tang ka jingnang jingstad kam lah ban khanglad ia ka jinglong riewkhlaw.
“Na ka jinglong ba la nang la stad, ka lah ban pynlong ia u briew uba kham don jingma lada u don ka jingduna ha ka jingmut jingpyrkhat,” ong u Sarma bad bynrap ruh “Wat ki professional ne ki briew ba la shemphang kum ki Doctor ki lah ban long kiba shyrkhei bha.”
