Shillong, Naiwieng 12: 53 ngut ki khunlung kiba dang shukha tang ha East Khasi Hills hi, kila iap na ka jingpang ba ktah ia u tor (Pneumonia) hapdeng u Iaiong bad Nailur mynta u snem.
Ia kane la pynpaw da ka District Maternal & Child Health Officer ka East Khasi Hills Dr EL Kharmutee ha ka sngi Balang haba pynbna ban sdang ia ka campaign ban shimkhia mardor ha ka ban pynduna ia ka jingiap ki khynnah na ka jingpang ba ktah ia u Tor (Pneumonia) naduh ka 12 tarik u Naiwieng 2025 haduh ka 28 tarik u Rymphang 2026.
Kane ka campaign ka thmu ban pynkloi mardor ia ki lad jingsumar ia ka Pneumonia kaba ialam sha ka jingiap jongki khynnah kiba hapoh 5 snem, da kaba pynkhlan ia ki jingpynsngewthuh paidbah, ban lap kloi bad ban ioh ai jingsumar.
Kala pyntip ba ki kam kiba kongsan ban leh ki kynthup ia ka jingai jinghikai ia ki nongtrei ka koit ka khiah bad ki nongtrei kiba hakhmat (ASHA, Anganwadi) ha kaba iadei bad ka jingkhmih ia ka jingpang Pneumonia ban pynsngewthuh paidbah lyngba ki Village Health Nutrition Days, ban pynthikna ba kan ym don ka jingthud ha ka jingpynbiang ia ki pulse oximeters, oxygen, antibiotics bad kiwei kiwei ki jingdonkam bad ban kyntiew ia ka rukom sumar bad rukom khmih bad ban pynduh ia ka rukom ring mynsiem ia ka tdem kaba mih hapoh iing bad ai nuksa ba dei ban kiar ia ka shet jingshet hajan ki khynnah.
Ka Dr. Kharmutee kala banjur ia ka jingdonkam ban iatreilang hapdeng ki shnong bad ki tnad ka koit ka khiah.
“Kane ka campaign ka pynskhem ia ka jingkular ka National Health Mission ban pynthikna ia ka koit ka khiah, ka jinglah ban im bad ban heh ban san, man la ki khynnah rit. Ryngkat lang ngin ia iengskhem ha ka jingkular ka jong ngi ban iada ia man la ki khunlung kiba dang shu kha bad ia ki khynnah rit, ban pynthikna ba kim dei tang ba kin im hynrei kin heh kin san ruh” kala ong.
Ka National Newborn Week kan sdang naduh ka 15 – 21 tarik u Nawieng 2025, halor ka mat “Newborn Safety: Every Touch, Every Time, Every Baby.”
Ha kine ki taiew yn pynshai shaphang ka jingkha da kaba shngain ia ki khunlung, ban kiar na ka jingioh pang, ban ai dud ka kmie bad ban pynkhlain ia ki jaka kiba sumar bad khmih ia ki khunlung kiba dang shu kha (SNCU, NBSU, NBC).
Ka jingpynsngewthuh ne Awareness kan dei kaban iadonbynta lang ki shnong ki thaw, ANM, ASHA bad ki nongtrei Anganwadi ban kyntiew ia ka koit ka khiah ki khunlung ha ka ri baroh kawei.
 hapdeng u Iaiong bad Nailur mynta u snem.){kind=link}