Kwah ka Congress ban pynkupbor ia ki Dorbar Shnong ban pynkhuid ia ka thup ki Nongthep Vote

Shillong, Naiwieng 12 : Ka Indian National Congress (INC) kala kyntu ban pynkupbor shuh shuh ia ki Dorbar Shnong ha ka jingpynrung kyrteng thep vote haba pynpaw ba kane kan iarap ban tem ia ka jingpynrung kyrteng ki briew ki bym dei ki nongthep vote ka Jylla bad pynthikna ban don ka electoral roll kaba khuid ha Meghalaya.

Haba kren sha ki lad pathai khubor ha ka sngi Balang, u Secretary ka Meghalaya Pradesh Congress Committee (MPCC) Bah Manuel Badwar ula ong “Ha ka jingialang ba dangshen ban iakren ia ka Special Intensive Revision (SIR)…..namar ba ngim don ia ka Panchayati Raj System hangne, ngi la pynpaw ha u Chief Electoral Officer (CEO) halor ka jingdonkam ban nang aibor shuh shuh ia ki Dorbar Shnong ( ha ka jingpynrung kyrteng thep vote).”

Kat kum ka jingong jong u, kane ka jingai jingmut kala ioh ruh ia ka jingkyrshan na kiwei pat ki nongmihkhmat jong ki seng sain pyrthei ha kane ka jingialang ba dei ban ithuh ruh ia ka bor ki Dorbar Shnong ha ka rules ban pynrung kyrteng thep vote.

“U (CEO) la kular ha ngi ba un sa shimkhia bha ban ai bor shuh shuh ia ki Dorbar Shnong khnang ban pynthikna ba kan don don ka jingpynrung kyrteng ia ki briew ba nabar bad ba ki nongthep vote ki bym dei ban ioh long ki nongthep vote ka Jylla kin ioh ka lad ban thep vote hangne” ong u Bah Badwar.

U Bah Badwar ula kren ruh halor ka jingrah vote na kawei ka jaka sha kawei pat ha ka Jyka-haba kdew ia ki jinglap ha ka campaign u Rahul Gandhi-ban ai jingmut ba kum kine ki rukom leh, bala iarap da ka “bor pisa” ka lah ban ktah ia ka rukom jied nongmihkhmat.

“Kumba phi iatip ia ka campaign u Rahul Gandhi, ki don bun ki nongthep vote kiba kynthih na kawei ka jaka sha kawei pat…mynta ki vote ha Delhi bad hadien arbnai, kin sa vote ha Bihar bad hadien lai bnai, kin leit vote ha Karnataka..kumta ka ai por bha iaki ban weng kyrteng na kawei ka jaka sha kawei pat kaba khlem pep kan ktah ia ka rukom jied nongmihkhmat” ula bynrap.