Shillong, Naiwieng 12 : U President ka Meghalaya Pradesh Congress Committee bad MP barim ka Shillong Bah Vincent H Pala ula ther ia ka Sorkar Jylla bad ka Khasi Hills Autonomous District Council (KHADC) halor ka jingkynnoh ba kila shu pynieng laki laka ia ki khyrdop, haba niew ia ki kum ki ATM ban dawa pisa na ki nongniah trok bad ki paidbah.
U Bah Pala ula kam ba ka jingdon jong ki khyrdop kala nang kiew naduh ba shimti ka Voice of the People Party (VPP) ia ka bor synshar ha KHADC, ha kaba haduh 10 tylli ki khyrdop thymmai kila mih na ki 24-25 ttylli kiba la don lypa, kaba lam sah ka jingbamsap bym tip shuh bad ka jingpyndik ia ki nongniah kali.
“Ki khyrdop, shisien ka por ki dei ki “ATM” ka NPP bad BJP, hynrei mynta kala kylla long ka tyllong thaw pisa jong ka VPP ruh, ha kaba kane ka Party kala nang pynbun shuh shuh ia ka jingdon jong ki. Mynshuwa, ka KHADC ka don hapdeng 24-25 tylli ki khyrdop hynrei naduh ba synshar ka VPP, sa 10 tylli ki khyrdop kila ieng, kaba la nang pynsniew shuh shuh ia ka jinglong jingman” ula ong.
U ong ba ki paidbah kila nang syrtok namar kane, da ka jingkiew dor ki mar bam mardih.
Kat kum ka jingong jong u, ka long kaba ilehrain ban iohi ba ki trok kila shah pynieng ha man ki khyrdop/weighbridge ha kaba ki nongniah kali kila shah pynbor ban siew ia ka pisa khlem da ai receipt lane thew ia ka mar.
“Bun bah ki khyrdop kila mih ha ki surok bypass kiba ka jingjngai kam dei kaba jrong-20 km ha Shillong bypass bad kumba 7 km na Jowai bypass” ong u Bah Pala.
Ula pynpaw ia ka jingsngewkhia halor ka jingeh bala mad da ki nongniah kali ba nabar ka Jylla, kiba bunsien ki ju shah shoh namar ka jingbym tip thikna ia ki kyndon.
U Bah Pala ula pynbna ba ka Congress kala rai ban pan jingtip lygba ka RTI ban lum ia ki sakhi halor ki jingkynnoh bamsap bad jingdawa pisa, da ka jingthmu ban rah ia kane ka kam sha Iingkashari.
 halor ka jingkynnoh ba kila shu pynieng laki laka ia ki khyrdop, haba niew ia ki kum ki ATM ban dawa pisa na ki nongniah trok bad ki paidbah.){kind=link}