Shillong, Naiwieng 10: U Myntri Rangbah ka jylla u Conrad K. Sangma, hynne ka sngi Nyngkong ula plie ia ka jingrakhe ia ka jubili ksiar kaban iaid baroh shi snem jong ka Amlarem Civil Sub-Division kaba la pynlong ha Madan Amlarem, West Jaintia Hills District, kaba dei ka jingdap 50 snem naduh ba la thaw ia kane ka Civil Sub Division ha u snem 1976.
Ha kane ka prokram la wan ban iadonlang ki myntri sorkar, ki MLA, MDC, ki heh ophisar sorkar, ki khlieh nongsynshar shnong, ki samla pule bad ki nongshong shnong na ki shnong kiba hap ha kane ka Sub-Division.
Kum shi bynta jong ka jingrakhe, u Myntri Rangbah ula buh ia u mawnongrim na ka bynta ar tylli ki projek kiba kongsan kaba kynthup ia ka Multi-Purpose Hall ha Amlarem kaba kot T.345 lak bad ka Multi-Purpose Hall ha Amlariang, Nongtalang kaba kot T. 74 lak da ka jingthmu ban pynkhlain ia ki jingtei ha ki shnong ki thaw.
Haba kren ha ka jingialang, u Myntri Rangbah ula pynpaw ia ka jingsngewnguh ia ki nongialam kiba dei ki nongseng kiba kynthup ia u (L) H Enowell Pohshna bad (L) Johndeng Pohrmen, ryngkat bad u Bah Renswit Jungai bad Welbin Jungai, kiba la noh synniang ia ka jaka na ka bynta ka ophis jongka Civil Sub-Division bad ula iaroh ruh ia ka jingnoh synniang jong ki ophisar kiba rim bad kiba mynta bad ki nongshong shnong ha kaban pynwandur ia ka jingiaid shaphrang jongka Amlarem ha kine ki phew snem kiba la leit.
Haba pynpaw ia ki jingshimkhia jong ka sorkar ban pyniajan ia ka jingai jingshakri bad ki paidbah, u Myntri Rangbah ula ong ba ki Civil Sub-Divisions bad ki C&RD Blocks kiba la thaw thymmai katba la nang pynbha bad pynkhlain pat ia kiba la don lypa.
“Baroh ha ka jylla ki don 46 tylli ki Block Office mynta kila don ia ka jaka treikam kaba thymmai bad la dep ban thaw ia 10 tylli ki Block kiba thymmai da ka jingdon ia ki jingtei kiba paka” ula ong.
Haba kren ha kane ka sngi jong ka jingrakhe, u Myntri Ragbah ula pynbna ban bhah tyngka ban tei ia ka Mini Secretariat ia ka Amlarem. “Nga kwah ban iohi ba ka kam kan sdang noh hapoh jong kane ka shisnem jong ka jingrakhe ia ka jubili ksiar. Ka Amlarem kadei ka sub division kaba rim tam bad kadei hok ban ioh ia ka mini secretariat” ula ong.
Ula pynbna ba shen yn sa pyntreikam noh ia ka Amlarem Water Supply Scheme bad yn sa bhah shuh shuh ia ka pisa kaba dang donkam bad ruh ban bhah ia ka pisa ban shna ia ka surok bad ban pynbha ia ka Amlarem Sub-Division. Ula pynbna ruh ban ai T.20 Lak na ka Chief Minister’s Special Grant na ka bynta ban rakhe baroh shi snem ia kane ka jubili ksiar.
Haba kren ha ka jingialang u Myntri ka pule puthi u Bah Lahkmen Rymbui ula pynpaw ba ka Amlarem kala sdang da kaba rit ha u snem 1976 bad kum u khynnah pule ula sakhi ia ka jingwan plie da u Myntri Rangbah ka jylla ha katei ka por u
Captain W.A. Sangma.
Ula pynkynmaw ba ha katei ka jingsdang, ka Sub-Division ka don tang khyndiat tylli ki skul bad ki ophis sorkar hapoh jong ka 25 km ka jingjngai hynrei mynta kala nang roi bad don haduh 30 tylli ki Lower Primary School, 20 tylli ki Secondary School, 2 tylli ki Colleges bad ki jan baroh ki ophis sorkar na ki tnad bapher bapher.
Ula ai ka jingiaroh ba ka jingkiew ka thain kadei namar ka jingiatreilang hapdeng ki paidbah bad ka sorkar bad ula ong ba ka jingdap 50 snem ka Amlarem kadei ka jingsdang kaba thymmai bad kam dei satia kaba kut.
Ula kyntu ia ka tnad Agriculture bad Horticulture ban phynkhie im biang ia ka jingrep ia u sohniamtra ha ka thain War Jaintia, ia kaba mynshwa la bna nam ha kaban khaii ia u sohniamtra sha ri Bangladesh bad ula iaroh ia ka sorkar halor ka jingbhah ia ki projek kiba thymmai kum ka jingkyntiew ia ka Community Health Centre (CHC) bad ka jingpynbna ban tei ia ki Multi-Purpose Hall.
Ha kane ka jingrakhe kala don ruh ka jingpyninam ia ka kolshor, ki jingrwai tynrai kiba la iashimbynta da ki samla pule bad ki kynhun na ki shnong bad la pynkut ia kane ka prokram da ki kyntien ai khublei na u Rangbah Shnong ka Amlarem bad ka jingrwai ia ka State Anthem da ki khynnah pule jongka Mang Hai Ryum Higher Secondary School.
