Shillong, Naiwieng 08: U Myntri Rangbah ka Jylla Conrad K Sangma haka jingdon lang u Deputy Commissioner ka West Garo Hills, Vibhor Aggarwal lem bad kiwei kiwei ki heh Sorkar u la leit jurip iaka PA Sangma Sport Complex kaba don ha Tura kaba dang don hapdeng ka jingpyntrei.
Ha kane ka jingleit jurip u Myntri Rangbah u la shong bishar bniah ia ka jingtei jong ki bynta bapher bapher jong ka projek, kynthup Indoor Stadium bad Indoor Swimming Pool.
Haba kren ha kane ka sngi, u Myntri Rangbah u la ong “Ngi don hangne ha PA Sangma Integrated Sports Complex ha Tura. Ka madan phutbol ka la dep ban shna bad ka la treikam bha haduh mynta. Ha kane ka Complex kan don ruh ka Indoor Swimming Pool, Indoor Badminton, Basketball bad ka Volleyball Courts. Kane ka projek kan long ka jingkyrkhu iaka thaiñ bad kan dei ruh shi bynta haka jingpynkhreh iaka National Games 2027″.
U Conrad u la pyntip ba ka jingpyntrei iaka Projek ka dang ïaid shaid shaid bad la khmih lynti ban pyndep ha u snem 2026.
Ka PA Sangma Integrated Sports Complex kadei ka Sports Complex ïa kaba la saindur ha ka rukom kum kiwei ki Sports Complex ha kiwei ki ri jong ka pyrthei namar kin don bun tylli ki jingdonkam kynthup ka Football Stadium, Indoor Stadium bad Indoor Swimming Pool bad kane ka Complex kan long kum ka jaka ba kongsan tam na ka bynta ka jinghikai, ka jingiakop, bad ka jingpynroi ia ki jingialehkai ha ka thain Garo Hills.
