Shillong, Naiwieng 06 : U Myntri Rangbah ka Jylla Conrad K Sangma ula pynbna ia ka jingthaw ia ka Committee ka ban buh jingthoh ia ka jingwan jong ki Jaidbynriew Garo na Tibet bad Khasi-Jaintia na Vietnam bad Cambodia.
“Ngi la thaw ia ka Committee, ka ban wad bniah shaphang ki riewlum ka Meghalaya bad buh jingthoh ia ka jingwan poi shong shnong jong ki Jaidbynriew Garo na Tibet, bad ki Jaidbynriew Khasi bad Jaintia na Vietnam bad Cambodia. Ka Committee kala iakynduh ban iakren ia kiei ki ban leh bad ka dang pynkhreh ia ki plan ban buh jingthoh ia ka jingwan poi jong kine ki Jaidbynriew riewlum sha ka Jylla” ong u Conrad.
Kat kum ka jingong jong u, ha ka jingwad bniah ba dang shu sdang la shem ba ki don bun ki jingiadei ha ka kolshor, ka ktien ka thyllieh bad ka jingleh nala tynrai hapdeng ki paid Garo bad ki briew ba na Tibet.
U Conrad ula pynpaw ia kane haba kren ha ka sngi sdang jong ka Hundred Drums Wangala Festival ba 49, ka ban long lai sngi lynter ha Wangala A’dam, Chibagre, West Garo Hills.
Ha kane ka prokram la wan iashimbynta ruh da ka MLA ka Gambegre Mehtab Chandee Agitok Sangma, u Chief Secretary ka Jylla Dr Shakil Ahhamed, Superintendent of Police ka West Garo Hills Abraham T Sangma bad kiwei ki Heh Sorkar.
U Myntri Rangbah ula pyntip ruh ba ka Sorkar Jylla kala shim ia shibun ki sienjam ban kyntiew ia ki kam wadbniah halor ka kolshor bad ka jinghiar pateng jong ki jaidbynriew riewlum ka Jylla bad pynpaw ba lyngba ka Chief Minister’s Research Grant, kala don ka jingwadbniah bad buh jingthoh ia ka kolshor, ka put ka tem bad ka jingleh tynrai jong ki riewlum ka Jylla.
“Haba jam shakhmat, ngi kwah ban wanrah shuh shuh ia ki sienjam ki ban kyrshan ia ka jingwad bniah ban lah pynneh pynsah ia ka kolshor. Ym tang ha ka jingthoh bad pynneh pynsah lyngba ki kot hynrei kan long ruh da kaba shna video” ula bynrap.
U Conrad ula pyntip ruh ba ka jingai jinghikai ia ki jingleh nala tynrai kiba la rim bha, kan dei ka lynti ban pyniaid shakhmat na ka bynta ki samla ba kin ioh jinghikai bad sngewthuh bad ban pynneh pynsah ia la ki jingleh tynrai bad ka kolshor bala iaid pateng la pateng jong ka Jylla.
Haba ai khublei ia ki kynhun bapher bapher kiba wan na kyllang ki jaka ka Ri-lum Garo ban iashimbynta ha ka 100 drum festival, u Conrad ula ong ba kum kane ka jingialum lang jong ki paid Garo na kylleng ki jaka ka dei ka jingkyrkhu jong u Blei bad pynpaw ruh ia ka jingsngewnguh ia ka Organising Committee kaba la bat ia ka kolshor bad ka jingleh tynrai jong ki Garo la jan 50 snem.
U Myntri Rangbah ula pyntip ruh ba ka jingpyntrei ia ka surok ban iaid sha Wangala A’dam, ka jaka ba pynlong ia ka tamasa kala iaid shakhmat bad la mang ia ka jinglut jingsep ba kot T.20 klur. “Da ka jingdep jong kane ka surok, ka lynti ban leit sha kane ka madan kan jlih noh bad kan pynsuk bad nang khring ia ki paidbah bad ki nongjngohkai ba kin wan sha ka tamasa” ula ong.
“Lashem snem ka ban dei ka jubili ksiar jong ka 100 Drums Wangala Festival, ka Sorkar kan kyrshan ba lah pynlong ia kane ka tamasa kaba kham heh bad kham phuh kham phieng shuh shuh” bad ai jingmut ba ka Sorkar kan sa thung ia ka State Level Committee ban pynlong ia kane ka tamasa.
Kiwei pat kiba la ai jingkren ki kynthup ia u Chief Secretary Dr Shakil Ahammed. Ia kane ka tamasa la pynsdang da ka jing duwai na u Rev Dilseng M Sanga, Rev Fr Januarious S Sangma bad Dr Imnanungshi Imsong, Principal ka HTC.
