Shillong, Naiwieng 03 : U Myntri ka Tnad Pule Puthi Lahkmen Rymbui ula ban jur ba ka Sorkar Jylla kala pynleit jingmut bha halor ki kam ban pynbha ia ki Iingskul.
“Kane ka dei ka Sorkar ba nyngkong kaba ithuh ba ki Iingskul ruh ki dei kiba don jingiadei bad ka rukom ai jinghikai ba paka ia ki khynnah” ong u Bah Rymbui haba iakren bad ki nongthoh khubor ha ka sngi Nyngkong.
Ka Sorkar kala kynshew pisa ha ka Mission I,II bad III bad thmu ban pynsdang sa ia ka Mission IV, kaba thmu ban kyntiew kyrdan ia ki Iingskul ha ki 15,000 tylli ki skul Elementary hapoh ka Jylla.
U Bah Rymbui ula ong “Ka jingthmu jong ngi ka long ban iohi ba baroh ki jingtei bala pyndonkam ban hikai ia ki Khynnah ki dei ban long kiba paka bad kiba biang nadong nadong”.
Ka Sorkar ka don jingthmu ban kyntiew kyrdan ia 150 tylli ki skul, kynthup 15 tylli hapoh ka ADB program bad maramot ia palat 160 tylli ki skul.
Haba pynpaw ba ka jingpynbha ia ki iingskul ka dei ka kam kaba iai bteng, u Bah Rymbui ula ong “Kam dei ka jingkylli ia 100 lane 1000 tylli ki skul, ka dei ka jingkylli ia 15000 tylli ki skul-ki skul shimet, skul Sorkar, skul ba ai jingiarap ka Sorkar, ki skul deficit bad kiwei kiwei”.
