Shillong, Risaw 31 : Ka kong Larisha Kharjana, ka Heh Pulit na Meghalaya, kala shah pynkup burom da ka Kendriya Grihmantri Dakshata Padak 2025 ha ka Ministry of Home Affairs (MHA) namar ka jingtbit jong ka ha ki kam tohkit.
Kat kum ka jingpynbna (notification) ka MHA ba 31 tarik Risaw, 2025, ka kong Larisha ka dei tang ma ka na ki heh Pulit na Meghalaya ka ban shah pynkup burom da kane ka National Award, kaba ai jingithuh ia ka jingbit ba kyrpang bad ka jinglong ba janai ha ka kam Pulit. La pyni ba ka kyrdan ka kong Larisha ka dei kum ka WPSI ka Meghalaya Police.
Ka Kendriya Grihmantri Dakshata Padak, ba la mynjur da u Myntri kam Pohiing ka Ri, ka dei kaba ju ai manla u snem sha ki Ophisar ha kylleng ka Ri namar ki jingtrei kiba long ki nuksa ha ki kam ba kyrpang, ki jingtohkit bad Forensic Science.
Ki nongioh khusnam mynta u snem ki kynthup ia ki Ophisar na kylleng ki Tnad Pulit ki Jylla ka Ri, ka Central Bureau of Investigation (CBI), ka National Investigation Agency (NIA) bad kiwei kiwei ki central agency.
Ha u 2016, ka Tnad Pulit ka East Khasi Hills kala ai ka jingithuh ba kyrpang ia ka synniang jong ka Kong Larisha ha ki kam tohkit ia ki kam bymman pyrshah ia ki Kynthei.
