Shillong, Risaw 28 : Ka Iingkashari Meghalaya High Court kala bthah ia ka Sorkar Pdeng bad Sorkar Jylla ba kin ai ia ka kaiphod ha ka dur jong ka affidavit ba iadei bad ka jingdik jong ki paidbah ha ka leit ka wan namar ka jingpynlong ia ki jingiakop khwai dohkha.
Ka Division Bench ba kynthup ia u Chief Justice Soumen Sen bad Justice W Diengdoh kaba pynmih ia kane ka hukum haba shong bishar ia ka Public Interest Litigation (PIL) bala register halor ka shithi na u Joannes JTL Lamare, ba kren ia kane ka mat.
Ka Iingkashari kala aipor lai taiew ia kine ki nongshah mudui ba kin aiti ia ka kaiphod.
“Ngi la sngap ia u Advocate General ka Jylla bad u DSGI ka Sorkar India. Ngi bthah ia ki nongshah mudui ba kin aiti ia ka kaiphod ha ka dur jong ka affidavit ba iadei bad ki sienjam bala shim halor kane ka kam hapoh ka lai taiew naduh kane ka sngi” ong ka Iingkashari ha ka hukum ba pynmih ha ka 27 tarik Risaw.
Ka Iingkashari kala buh ban shong bishar biang ia kane ka kam ha ka 25 tarik u Naiwieng.
