Rai ka Sorkar ban mudui ia ka hukum ka SC | Kwah pyllait ia ki Nonghikai ba iohkam shuwa ka RTE Act na ka TET

Shillong, Risaw 27 : Ka Sorkar Jylla kala rai ban file ia ka review petition ( mudui ban bishar biang) ha Iingkashari Supreme Court ba long pyrshah ia ka hukum kane ka Iingkashari ba pynmih ha ka 1 tarik Nailur 2025, kaba pynlong kongsan ia ka Teachers Eligibility Test (TET) ia baroh ki nonghikai ba don ha ka kam, kam pher ia ki snem ba kila shakri.

U Myntri ka Tnad Pule Puthi Bah Lahkmen Rymbui ula iathuh ba ka nongrim jong ka Sorkar ka long ba kane ka hukum ka dei kaba ktah ia ki snem bala leit noh bad ka kwah ba ka Iingkashari Supreme Court kan pyllait noh ia ki nonghikai kiba la thungkam hashuwa ban treikam ka Right to Education (RTE) Act.

“ Ka jingbym iahap jong ngi ka long ba kane ka hukum ka Iingkashari Supreme Court ka don jingktah ia ki snem bala leit noh bad kaei kaba ngi kwah ka long dei ban pyllait noh ia ki nonghikai ba iohkam shuwa ka RTE Act na ka TET” ula ong haba iakren bad ki nongthoh khubor.

“Hadien ka jingwan jong ka RTE bad ka jingpynbna ba bud jong ka NCTE kaba dei ka bor pyniaid ia ki skul Elementary bad Primary, kila buh ia ka kyrdan na ka bynta ki nonghikai ia kaba ngim shym la pyrshah eiei ruh em” ong u Bah Rymbui.

U Bah Rymbui u ong ba haduh 32,000 tam ki nonghikai kin sa shah ktah ha kane ka hukum, kaba mut ba kin hap ban pass ia ka TET hapoh ka arsnem.

Ula pynpaw ia ka jingsngewkhia ba bun na kine ki nonghikai lehse kin nym lah satia ban pass ia ka TET hapoh ka por bala buh.

U Myntri ula pynshai ba ki nonghikai kiba la dep pass ia ka Meghalaya Teachers Eligibility Test )MTET) lane ka Central Teachers Eligibilty Test (CTET) kin nym donkam shuh ban iakhun ia kiwei pat ki eksam TET bad ka kam jong ki ka long kaba shngain.

Haba iadei bad ka jingai jingmut jong ka State Education Commission ban weng kam noh ia ki nonghikai ki bym pat biang kyrdan, u Bah Rymbui ula ong ba kane ka shong ba kumno ngi pynwan ia ka namar ka Sorkar kala thung ia ki nonghikai kat kum ki kyndon bala buh da ka National Council for Teacher Education (NCTE).

“Kane ka mut ba baroh ki dei ki nonghikai kiba la biang kyrdan” ula bynrap.