Shillong, Risaw 27 : Ki Pulit ka West Garo Hills da ka jingiarap ki Pulit ka Delhi, kila ioh ban pyllait im ia kawei ka Khynnah kaba shah rahbor ha uwei u briew na Rajabala mynta la shisnem tam.
Ia kane ka khynnah la lap ha Delhi bad la wan ialam biang ia ka sha Tura, ka District Headquarter ka West Garo Hills, ha ka sngi U Blei.
Ia ka ejahar ba jah rngai kane ka khynnah, la ujor ha ka 20 tarik Risaw, 2024 da ki bahaiing hasem.
U Superintendent of Police (SP) ka West Garo Hills, Abraham T Sangma, ula iathuh ba ki Pulit kila pyrshang ban wad ia une u nongrahbor bad ia ka khynnah la shisnem hynrei dei ha kine ki khyndiat sngi, ba kila ioh ia ka jingtip ba kane ka khynnah ka don ha Delhi.
“Ngi la pan ia ka jingiarap ki Pulit ka Delhi bad kila iarap ia ngi ban lap ia kane ka khynnah ha Delhi. Ngi la phah ia ka kynhun ha ka sngi Thohdieng bad ha ka sngi Saitjain, ngi la shem ia ki bad la wanrah biang ia ki sha Tura hynnin ka sngi” ong u Sangma.
Haba nyngkong, ia kane ka jingjia la register hapoh ka case rahbor pyrshah ia une uba shah kynnoh hynrei hadien bala ioh pyllait im, la pynngat lang ia u hapoh ka kyndon Protection of Children from Sexual Offences (POCSO) Act.
Une u Heh Pulit u pyntip ba ia une u briew la ialam tian bishar bad ka Iingkashari kala hukum ban set ia u hapoh ka Judicial custody ba 14 sngi.
Ka khubor ka iathuh ba kane ka Khynnah kala kha ia I khun Kynthei ha Tura Civil Hospital ha ka step sngi U Blei.
Ia kane ka Khynnah la ialam sha Delhi da uwei u briew ba kyrteng u Atowar Hussain ba ju khot sin u Rahul, uba dei na Rajabala, West Garo Hills.Ha katei ka por, ka dang dei tang ka khynnah.
Hadien shisnem, kane ka Khynnah kala ioh phone ia ki kmie kpa, bad pan jingiarap haba pynpaw ruh ba kala shah set ha Delhi hynrei kam tip pat ia ka jaka.
Namar ka jingkhuslai, ki kmie kpa kila pan ia ka jingiarap jong ka seng ACHIK, kaba la shimkhia mar mar bad iatreilang bad ki Pulit ka Tura Women Police.
Ha ka 21 tarik Risaw, ka kynhun ka ACHIK ha ryngkat ki bahaiing kane ka Khynnah, kila leit sha Delhi ban wad ia kane ka khynnah. Hadien ka jingiawad katto katne sngi, kila pynthikna ba la set ia ka ha Batla House, ka kyntoit kaba don ha South Delhi. Ia kane ka jingtip la phah mar mar sha ki Pulit ka Tura Women Police.
Ha ka 24 tarik Risaw, ka kynhun na ka Tura Women Police ha ryngkat ka jingiatreilang bad ki Pulit ka Delhi bad bala synran da ka kynhun Special Police Unit na ka Northeastern Region (SPUNER), kila pynlong ia ka jingkhynra ha Batla House bad kila ioh ban pyllait ia kane ka khynnah bad ioh kem ia u Atowar Hussain.
