Shillong, Risaw 23: U Chief Executive Member (CEM) ka KHADC Bah Winston Tony Lyngdoh, ula kynnoh ba ka Sorkar Jylla ka ai Labour Licence ia ki nongbylla bar Jylla wat ia ki bym pat rung shapoh ka Jylla Meghalaya.
Haba jubab ia ka Motion halor ka jingai ia ka Non-Tribal Employee Clearance Certificate (NTECC), u Bah Winston u la ong “Nga la iohi ruh ba ki nongbylla bar Jylla ki bym pat ioh trei ha Meghalaya, ki la dep ioh iaka labour license na ka Sorkar Jylla. Kane ka long kaei kaei kaba sngewdiaw mynsiem. Kumno u briew un ioh lypa iaka Labour License haba u dang don sha bar ka Jylla Meghalaya”.
Ia ka NTECC la pynmih katkum ka ain jong ka United Khasi-Jaintia Trading by Non-Tribal Regulation, 1954.
Ka KHADC ka la ai ia ka NTECC naduh u snem 2020 hadien ka jingiakren bad ka rai jong ka Executive Committee (EC) ha ka 4 tarik Jylliew 2020.
“Kumta ka rai jong ngi ban ai ïa ka NTECC ka long hadien ba ngi la ïohi bad ngi la bishar markhmat ia u nongbylla bar Jylla uba aplai Labour License. Ngi ai ïa ka slip ban ai por ïa ki nongtrei bar Jylla ban pynbiang iaki kot ki sla kum ka EPIC, Aadhaar, Residential Certificate, Passbook Account, bad kiwei kiwei ki kot ba donkam hapoh 15 sngi” ong u Bah Winston.
“Kumba nga la kdew ba u nongbylla bar Jylla u lah ban ïoh da kaba suk ïa ka labour licence na ka Sorkar Jylla watla u dang don shabar ka Jylla. Ka KHADC ka la rai ban pyndonkam ïa kane ka kyndon da kaba pynlong ïa ki jingjurip, ki jingpeit bad bishar bniah markhmat bad ki nong aplai Labour License. Ka jingpyntreikam ïa ka NTECC ka dang ïaid shakhmat, bad ngi la bthah iaki ophisar ban ithuh ïa ki nongtrei bad Jylla khnang ban ai ïa ki syrnod ba donkam” ula ong.
“Ïa ka KHADC la ai bor lyngba ka Second Proviso Sub-section 2 jong ka Section 3 ban ai ïa ka NTECC. Watla ka Meghalaya Migration Act ka la shim noh ïa ka bor jong ngi ban ai ïa ki labour clearance certificate, hynrei ngi sngewthuh ba ka don ka jingïatyngkhuh bad kane ka aiñ, hynrei ngi sngewthuh ruh ba kine ki nongtrei bar Jylla ki trei hapoh ka jaka Sixth Schedule namar kata ka District Council ka dang don ïa ka bor” ula ong.
