Ther kylla ka HNLC ia ka DGP | Ka jingiakren iasuk ka dei ban long halor ka burom markylliang

Shillong, Risaw 22: Ka seng kiengatiar Hynniewtrep National Liberaton Council (HNLC) kala pynrem jur ia ka jingkynthoh ba dang shen jong ka Director General of Police (DGP) Kong Idashisha Nongrang.

“Ki kyntien jong ki ki pyni ba haduh katno ki briew ba don ka snam hynniewtrep kila jngai nala ka jong ka tynrai bad ka jingieid iala ka jong. Ka long kaba sngewsih ba kawei na ki briew lajong ki jied ban long ki sur jong ki bor nongwei ha ka jaka ban sur ka sur jong ki briew lajong” ong u General Secretary ka HNLC Bah Sainkupar Nongtraw ha ka kyrwoh ba pyllait ha ka sngi Balang.

Ka HNLC ka khmih ia ka jingkren ka DGP kum ka jingpyrshang ban khein troin ia ka jingiakhih ba dei hok na ka bynta ka jinglaitluid ka Hynniewtrep bad ka jingpyni ia ka jingkohnguh ia ka Ri India ha ka jaka ia ki paid Hynniewtrep.

U Bah Sainkupar ula buh jingkylli ia ka jingkren ka DGP ia ka “rukom treikam jong ngi bad ka Ri jong ngi” da kaba kylli ka rukom treikam bad ka ri jong no kaba ka kren.

Ula kam ba ka bri Hynniewtrep kam pat aiti iala ka jong ka jinglaitluid lane pdiang ia ka jingsynshar ki bor nongwei bad ba ka jingmih ka HNLC kam dei ban pyni ia ka jingdon jong ka lyngba ki kam umsnam hynrei ban pynneh pynsah ia ka jingdon ka ri Hynniewtrep.

Une u Nongialam ka HNLC ula iai ban ruh ba ka seng ka long kaba kloi ban iakren iasuk hynrei ka dei ban long halor ka jingia burom markylliang bad ka jingithuh ba dei hok, ban ithuh ia ka ri Hynniewtrep bad ki briew ba kham pher jong ka bad kum ka liang mamla kaba iaryngkat kyrdan ha kano kano ka jingiapynbeit.