Shillong, Risaw 22 : Ki Nongshongshnong jong kawei ka Dong ha Mawlai Mawroh, kila hap ban ianoh synniang pisa bad iatynrong hi halade ia ka jingkitkhlieh ban shna ia ka surok bala jot rathai hapoh ka Dong namar ka daw ba ki jingkular na ki Nongmih khmat paidbah (MLA bad MDC) kila sahkut hangno re bad slem ban poi.
Kane ka Dong jong ka shnong Mawlai Mawroh ka dei ka Dong Pingwait-kaba la pynshna hi ia ka surok dewbilat ba jrong kumba 200 meter eiei, da ka pisa kaba la ianoh synniang da ki nongshongshnong ka Dong, kynthup ia ki Iing ba don kali ne thuk thuk bad ki bym don ruh kumjuh.
Kane ka surok dewbilat ha Dong Pingwait ka dei kaba la shna naduh u snem 2017-2018 lyngba ka skhim na ka Khasi Hills Autonomous District Council (KHADC). Kane ka surok kala jot bad bun satang ki thliew ki syar, kaba la buh ha ka jingeh ia ki kali ne thuk thuk ba kin iaid.
Kat kum ka jingiathuh u Secretary ka Shnong Bah PM Hynniewta, ula iathuh ba Dong Pingwait dang shen kala lum ia ka jingialang hapoh ka Dong kaba iakren halor kane ka surok bad kane ka jingialang da kawei ka sur, kala shim ia ka rai ban kyrpad ia ki Iing kiba don kali ne ar shaka, ba kin iasnohkti da kaba iasynniang pisa ban ioh maramot ia ka surok.
La kyrpad ruh wat ia ki Iing ki bym don kali ne arshaka ba kin iasnohkti lang ha kaban lah pynurlong ia kane ka jingthmu.
U Bah Hynniewta ula iathuh ba wat ki nongshongshnong jong ki dong ba marjan, kiba ju pyndonkam lang ia kane ka surok ha ka leit ka wan, kila noh synniang kylluid mysiem ban lah pynmih ia ka pisa kaba donkam.
“Kane ka jingianoh synniang jong ki nongshongshnong kiba don kali ne ki bym don kali ruh kumjuh, ka pyni ia ka jingiatylli jong ka Shnong na ka bynta kane ka surok” ong u Secretary.
U Rangbah Dong ka Pingwait Bah Strong Pillar Mawtlang ula iathuh ba ka Dong kala pyrshang ia bun ki lad ki lynti ban ioh ia ka jingiarap na ka bynta ban ioh shna pynbha ia ka surok hynrei baroh ki jingpyrshang kim shym la poi shano shano ruh.
Haba kylli, ula iathuh “Ngi la leit pynsngew ha u MLA bad MDC ka Mawlai bad bunsien kila ia wan peit ia kane ka surok hynrei kiei kiei baroh kila shu kut tang ha ki jingkular katba ka surok kala nang jot nang jot” ula ong.
U iathuh ba dei namar kane ka daw, ka Executive Committee jong ka Dong Pingwait kala lum ia ka jingialang ban iamir jingmut kumno ban pynmih pisa bad da kawei ka jingmut la rai ban shu ialum ia u syniang na ki Longiing ka Dong”.
U Bah Strong Pillan ula pynpaw ia ka jingsngewnguh ia ki nongshongshnong ka dong bad kiba marjan, kiba la noh ia u synniang da ka jingkylluid mynsiem ban ioh maramot ia ka surok.
“Haduh mynta, ka Dong kala ioh lum T.70,000 bad ka dang ap ia kito ki ing kiba don kali ba kin wan ban ai ia u synniang jong ki khnang ba yn lah pyniaid shakhmat ia ka kam” ula ong.
U Rangbah Dong ula pynpaw, ba ka jingmaramot ia kane ka surok kan shong eh ha ka jingioh lum ia u synniang bad ka Dorbar kan hap ban pyntrei ia ka surok katba dap katei ka pisa bad ban shu maramot noh tang ia ki jaka kiba la sniew bha.
 kila sahkut hangno re bad slem ban poi.){kind=link}