Shillong, Risaw 16: Da ka jingsngewkhia halor ka jingjia khah khah jong ka jingshah thombor ki khynnah kynthei bad ki longkmie, u Myntri Rangbah ka jylla Conrad K Sangma ula lum iaka jingialang ha Secretariat bad ki kynhun bapher bapher ban iatai bad ban shim ia ki sienjam ban tehlakam ia kine ki jingjia.
Ha kane ka jingialang la wan ban iashimbynta da ki nongialam niam, ki nongialam shnong, ki nongialam na ki synjuk bad ki kynhun bapher bapher ha kaba kila pashat bad ai jingmut ia ka sorkar ha kaba iadei bad kane ka mat kaba sngewkhia.
Haba iakren bad ki nongthoh khubor hadien ba la wai ka jingialangm u Conrad Sangma ula ong, ba ka sorkar kala shimkhia bha ia ki jingjia kiba dang shen watla kala don ka jinghiar bha jong kine ki jingjia.
“Ka jingjia khah khah ki katto katne ki jingjia kila jia ha ki taiew bad ki bnai kiba la dep kadei ka mat kaba ngi sngewkhia bha. Ngi kwah ban pynthikna ban shim ia ki sienjam kiba thikna ban pynduna ia kine ki jingjia bad peit kumno ka imlang sahlang, ki Rangbah Shnong, ki kynhun bad ka sorkar ka lah ban iatreilang ban pynurlong ia katei ka jingthmu” la ong u Conrad.
Ula pyntip ba ki nongiashimbynta kila ai jingmut kiba kordor, kynthup ia ka jingdonkam ban pynbun ia ki counseling centers bad ki counselor kiba tbit ban kyrshan ia ki khynnah bad samla. “Ngi lah shim ia kine ki jingai jingmut bad ngin sa leh ruh ia kaba donkam” ula ong bad ka iathuh ba ki nongiashimbynta kila ai jingmut ban pynlong ia jingpynsngewthuh paidbah ne Awareness Programme kaba heh bad ki jingpathai khubor ban pynsngewthuh ia ki khynnah halor ki mat kiba iadei bad ka imlang sahlang bad ban don ia ka jinglong kaba don akor bad ka sorkar shen kan sa sdang noh ia kitei ki prokram ha ki kyrdan bapher bapher.
Ban pynkhlain ia ka jingai jingshngain ia ki paidbah, u Myntri Rangbah ula pynbna ba ka jingpyndait ia ki kor CCTV ha ki shnong kiba kongsan kadei kaba dang iaid shakhmat.
“48 tylli ki shnong kila dep ai jingtip bad ka jingpyntreikam kala sdang. 7 tylli la dep ban pyndep bad sa 40 tylli un sa kynthup lang ha ki 60 sngi. Kin sa don shuh shuh ki shnong kiban sa shimkhia lada donkam” ong u Sangma.
U Myntri Rangbah ula ong ruh ba ka jingpynbha ia ki post elektrik da ka jingiatreilang bad ki shnong kadei kaba la shimkhia bad kaba la pdiang ban kyntiew ia ka jingshngain ha ka por mynmiet.
Nalor kane ula pynpaw ia ka jingsngewkhia halor ka jingsaphriang ia ki jingtip ki bym pat thikna lyngba ka rynsan Social Media, u Sangma ula kyntu ia ki nongshong shnong ba kin pynpaw ne ai kano kano ka jingpynsngew mardor ia ki jingring dur ne jingthoh kiba la saphriang ha ki rynsan Online.
“Bun ki por, ki khubor ki bym pat thikna kila saphriang kloi bad ialam sha ka jingialum ia ki paidbah ne jingkhuid u paidbah. Nga kyntu ia ki nongshong shnong ba kidei ban pynshisha shwa ia ki jingtip hashwa ba kin pynpaw ne leh eiei bad ban shaniah ha ki nongialam shnong bad ki pulit ban shimkhia thikna ia katei ka mat da ka jingkitkhlieh” ula ong.
U Myntri Rangbah ula ong ba la pynwandur ha ki ar wat ha kaba iadei bad ka jingpyntreikam ia ki kor CCTV, “Ha ka wat kaba nyngkong ia ka Local Command Center un sa buh ha ki shnong ki thaw hapoh ka jingpyniaid jong u Rangbah Shnong bad ka Dorbar. Ha ka wat ka baar yn sa pyniasoh bad ka State Central Command and Control System”.
Ula ong ba ki kam kila sdang hapoh jong ka Shillong Municipal Board, ha kaba la depo ban ithuh ban pyndiat ia ki CCTV ha ki 47 tylli ki shnong bad man la ka shnong kan don 3 ne 5 tylli ki jaka ban buh ia ki CCTV. 7 tylli ki shnong kila dep ban pyndep bad kiba dang sah kidei kiba la khmih lynti ba kin long kiba la pynkhreh ha u Naiwieng bad Nohprah.
Ula ong ba yn sa pyniar ia kane ka rukom pyntreikam ha Tura, Jowai bad kiwei kiwei ki district headquarters, sub-divisions ha ki wat ki bapher bapher. Hynrei kumba long mynta ka jingpynleit jingmut kan long ha ki jaka kiba don ha sor bad khapsor bad lah ruh ban kynthup lang ia ki skul hadien ba kala don shwa ka jingiasyllok.
“Ka thong ka long ban tei ka jingling jingman jong ka jingshngain ia baroh” la ong u Myntri Rangabh bad ka pynthikna ba ka sorkar ka iengskhem ban iatreilang ryngkat bad ki shnong ki thaw bad ki jaka pule ban iada ia ki khynnah bad ia ki longkmie ha kylleng ki bynta jong ka jylla Meghalaya.
