Shillong, Risaw 16 : Ka Kynhun ki Heh ka Indian Olympic Association (IOA) bad ka Sports Authority of India (SAI), kila wan iuhkjat ha ka 15 tarik Risaw ha Shillong ban peit thuh ia ka jingpynkhreh bad ban pynbeit ryntih ia ki buit treikam na ka bynta ka 39th National Games ban long ha Meghalaya ha u snem 2027.
Ia ka jingialang bishar kam la pyniaid da u Dr Vijay Kumar D, Commissioner & Secretary ka Tnad Sports & Youth Affairs, ka Sorkar Jylla, ha ka jingiadonlang u Richard Yanthan, Joint Secretary; kong Matseiwdor War Nongbri, Vice President, Meghalaya State Olympic Association (MSOA); D.D. Shira, Director, ka Tnad Sports bad Youth Affairs; bad u Bah John F. Kharshiing, Working President, MSOA.
Kane ka kynhun ka IOA bad SAI kila leit ruh ban jurip ia ki madan ialehkai bapher bapher kynthup ia ka Umtham White Water Village, ka Umiam Lake (Water Sports), JN Sports Complex, madan Shillong Sports Association, madan ka Meghalaya Football Association bad ka Integrated Hospitality & Sports Complex.
U Vijay Kumar ula kren halor ka jingieid kam ialehkai ha Jylla Meghalaya, ka jingshna ia ki madan ialehkai bad ka jinglong bala khreh jong ka Jylla ban pynlong ia ka National Games.
Kane ka kynhun ba wan jurip ki kynthup ia u Amitabh Sharma, Executive Council Member, IOA; Sahdev Yadav, Treasurer, IOA & President, Indian Weightlifting Federation; Mamta Shree Ojha, Director, Khelo India, SAI; bad Shrinivas Malekar, Deputy Director, Khelo India, SAI.
U Amitabh Sharma ula pynskhem ia ka jingkut jingmut ka IOA sha ka National Games bad thmu ban pynlong haduh 36 tylli ki jait jingialehkai ryngkat ka lad ban nang pynbun shuh shuh.
U Sahdev Yadav, Treasurer ka IOA ula ban jur ia ka jingkongsan ka National Games ha kaban pynroi ia ki kam ialehkai bad ki jingtei ia ki madan ialehkai ha Meghalaya, haba kular ia ka jingkyrshan bad jingiatreilang ba pura na ka IOA.
Ka jingialang kala iakren ruh halor ka jingiaid ki jingtei ia ki madan ialehkai ha Shillong, Tura bad Jowai bad ka jingpynkhlain ia ki Sports Federation, khamtam jong ki jingialehkai kiba duna ki nongialehkai.
Ki heh ka IOA bad SAI kila ban jur ba kum ka Jylla kaba pynlong ia kane ka lympung ialehkai, ki nongialehkai ka Jylla Meghalaya kin ioh ia ka lad ban iakhun ha baroh ki jait jingialehkai kam pher ia ki kyndon bala buh ban ioh iashimbynta.
