Shillong, Risaw 15 : Ka Achik State Peoples’ Front (ASPF) kala buh ia ka jingujor hakhmat ka Director General of Police (DGP) I Nongrang pyrshah ia ka jingkynnoh pyndik bad dawa pisa ia ki paid nongleit nongwan ka Jylla Meghalaya da ki Pulit ka Assam ha Kukutkata Outpost bad ha surok Damra-Dudnoi.
Ha ka shithi bala aiti ha ka sngi Ba-ar, ka ASPF kala kynnoh ba ki kali kiba don ia ka registration na Meghalaya kila shah pynsangeh lut khlem kano kano ka daw.
Ka ong ba ki nongleit nongwan kila mad ia ki jingshah pyntieng, shah byrngem bad shah kylli jingkylli watla la pynbiang bad pyni lut ia ki kot ki sla kali.
La kynnoh ba ki Ophisar kila dawa pisa beit beit na ki nongniah kali bad lada kyntait, ki ju mad ia ka jingshah pyndik ba harukom, byrngem ban kurup ia ka kali lane ka jingpynslem ban pyllait.
“Kum kine ki kam ym tang ba ka pynjynjar ia ki nongleit nongwan hynrei ka pyniashun ruh hapdeng ki nong shongshnong hapdeng ki ar tylli ki Jylla” kala ong.
Ka SPF kala kyntu ia ka DGP ba kan iakren lem ia kane ka kam bad ki Heh Pulit ka Assam ban pynthikna ba kan kut noh kane ka jingleh beain.
Kala ai jingmut ruh ban don ki lad peitngor lang hapdeng ki Pulit ka Jylla Meghalaya bad Assam ban iada ia ka hok ki nongleit nongwan nalor ka jingia iaid pahara lang lane buh ia ka jaka ujor ba kyrpang na ka bynta ki nong leit nongwan kiba mad ia ka jingshah pyndik ha kane ka surok.
 kala buh ia ka jingujor hakhmat ka Director General of Police (DGP) I Nongrang pyrshah ia ka jingkynnoh pyndik bad dawa pisa ia ki paid nongleit nongwan ka Jylla Meghalaya da ki Pulit ka Assam ha Kukutkata Outpost bad ha surok Damra-Dudnoi.){kind=link}