Shillong, Nailur 14: Ka thma ktien kaba jur kala mih hapdeng u MLA ka KHNAM na North Shillong Bah Adelbert Nongrum bad u Myntri Rangbah ka Jylla Conrad K Sangma lem bad u Symbud Myntri Rangbah, Bah Prestone Tynsong halor ka kam iapynbeit pud hapdeng ka Meghalaya bad ka Assam.
Kane ka thma ktien kala mih ha ka kynta kylli jingkylli halor ka jingiakajia pud ka Assam bad Meghalaya.
Kane ka thma ktien kala sdang hadien ba u MLA ka KHNAM ula ther ia u Conrad Sangma bad kob ia ka Sorkar Jylla lada ka nud ban shong bishar thymmai ia ka MoU bala iasoi ban pynbeit ia ki 6 tylli ki jaka ba iakajia.
Haba jubab ia kane ka jingkob, u Myntri Rangbah ula kob kylla ia u MLA ka North Shillong lada u lah ban pule ia ki kyrteng jong ki 12 tylli ki jaka ba jakajia pud khlem da pule na ki kot bad ruh ban batai ba haduh katno sien ula ju leit ban iuhkjat ha kine ki jaka ba iakajia.
Kane kala pynbitar lep ia u MLA ka KHNAM uba la pynpaw ba un nym leh satia ia kane namar ka dei ka kamram jong u Myntri Rangbah.
Haba kyrshan ia u Myntri Rangbah, u Symbud Myntri Rangbah Bah Prestone Tynsong ula pynkynmaw ia une u MLA ba u dei ban iaid beit tang da ki jingkylli ym ban iaid palat bad pyni ia ka jingsngew. Ka sur jong kine ki laingut (CM,DyCM bad MLA) kala sawa jam ban ia ka sur u Lamphang uba la pyrshang ban pynjai jai ia baroh arliang.
Kane ka jingiatai nia kaba thnem bha kala neh kumba 2 minit eiei. Hynrei u Lamphang ula lah ban pynsngap jar ia baroh arliang bad la ailad biang ia u Myntri Rangbah ba un jubab ia ka jingkylli jong u MLA ka North Shillong.
“Nga sngewthuh ba ngi don iala ki jong ki jingsngewkhia halor kane ka kam bad nga burom ia ki jingsngew jong u. Nga la pan na une u Dkhot tang ia ka kyrteng jong ki jaka ba iakajia namar ngi shu don jingsngew khia khlem da tip ia kine ki jaka. Ban shu hylla ban pyni ia kum kine ki drama ia kabym lah satia ban tip ia ki daw lehse ba ka eleskhon kala jan, mano ban tip, kane ym iarap hi ruh” ong u Myntri Rangbah.
