Rakhe ka Jylla ia ka sngi ki Khynnah Kynthei | Ban jur u CM ia ka jingshngain ki Khynnah

Shillong, Risaw 13: Ka Tnad Social Welfare ka Sorkar Jylla, ha ka sngi Nyngkong, kala rakhe ia ka sngi ki Khynnah Kynthei ne ka International Day of the Girl Child 2025 hapoh ka matpdeng “”Ka Khynnah Kynthei kaba Nga Long, Ka Jingkylla kaba Nga Ialam: Ki Kynthei kiba don ha khmat eh jong ki jingeh,” ha Lariti Auditorim, Mawkasiang, kaba pynpaw ia ka jingjop, ka jinglah ban iai shah bad ka jinglah jong ki Khynnah kynthei na kylleng ka Jylla.

Ia kane ka jingrakhe la pynshongkun da ka jingiadonlang u Myntri Rangbah ka Jylla Conrad K Sangma kum u kongsan, u Bah Paul Lyngdoh, Nongaibuit ka Tnad Social Welfare kum u symbud kongsan bad kiwei kiwei.

Haba ai jingkren, u Myntri Rangbah ula pynpaw ka jingsngewnguh ia ka Tnad Social Welfare bad ruh ia ka jingkongsan jong ka jingiatreilang kum ka kynhun ha kaban ioh ia ka jingkiew kaba don jingmut. Ula ialam ruh ia ki nongiashimbynta ha ka jingsngap jar ba arminit kum ka jingpyndon burom ia ki jingim jong ki Khynnah kiba iap ha ki jingjia ba dang shen, haba pynkynmaw ia baroh ia ka jinglong synjor ka jingim bad ka jingdonkam ban peitngor bad ban iada.

Haba kren sha ki khynnah pule, ula ban jur ba kane ka jingrakhe ka dei ban dei ka jingsdang jong ka jingkylla ha ka imlang sahlang ha kaban ai jingkyrshan ia ki khynnah kynthei. Ula kren ia ki sienjam kum ka jingpynkha ia ka Reusable Sanitary Pad Unit bala bei tyngka da ka Chief Minister’s Special Development Fund bad ba pynmih daki Self Help Group, kaba kyntien ia ka jingkupbor ia ka ioh ka kot ban eh ha ka thain.

Ula kren ruh halor ki sienjam ba thymmai hapoh ka Safe Motherhood Program kynthup ki song sumar ia ki Kmie na Nongkyndong da kaba ai ia ki tiar na ka bynta ki Khunlung ba dang kha bala pynmih da ki Self Help Group. Ula ban jur ia ka jingkongsan ka jingshngain ki Khynnah, haba kdew ia ka bynta jong ka technology, ki prokram ha ka imlang sahlang bad ka jingiatreilang bad ki seng trei mon sngewbha bad ki seng niam.

Haba kren halor ka jingdih droks, u Myntri Rangbah ula kren halor ka jingpynkhain ia ki jaka ai jingsumar kum ki detox bad de-addiction centre, ka jingpeitngor ha ka imlang sahlang bad ka jingpyrshang ban tehlakam ia ka jingwan poi u droks. Ula pynshlur ia ki khynnah kynthei ba kin pyrkhat laitluid, ban shim ia ki rai da ka jingsngewskhem, bat iala ka burom, haba kdew ba wat ka jingjied kiba rit ki lah ban don ka jingktah ia ka hadien habud.

Ha ka jingïathir, ki samla pule ki la kren shitrhem bad u Myntri Rangbah ka Jylla, da kaba pynpaw ïa ki jingeh bad ki jingai jingmut halor ki mat kiba bun jait. Ki jingiakren ki kynthup ia ka jingdonkam ban pynbha ia ka jingbam sngi ha ki skul, ban pynbha ia ki lad jingiada na ka bynta ki khynnah kynthei, ban wanrah ia ki jinghikai kumno ban iada ialade, bad ban kyrshan kham bun ia ki nongialehkai ba dang khynnah bad kiwei kiwei.

Ha kane ka sngi la pynkup burom ruh ia ki nongjop, haba ai jingithuh kyrpang ia ki khynnah kynthei kiba pass bha shakhmat ha ki jingpule, kam ialehkai, ka jingshakri ha ka imlang sahlang, ka sengkam sengjam, ka jingshlur bad ka jing long nongialam ha shnong ha thaw.

Ka jingrakhe ka kynthup ruh ia ka jingkren ai mynsiem da ka samla Daphisha Kharbani, Nongseng ka Majestic Dance Academy bad ka samla Anjelina Tynhlaiang, kaba kadei ka Paralympic athete, kaba ka khana jong ki kala aimynsiem ia ki samla pule ba kin bud ia ki jingangnud jong ki da ka jingsngew skhem.