Shillong, Risaw 10 : U Symbud Myntri Rangbah bad Chairman ka Regional Committee ka West Jaintia Hills, Bah Sniawbhalang Dhar, ha ka sngi Thohdieng ula pynthikna ba lah tem ia ka jinglong jingman ha Lapangap bad la khmih lynti ba ka jinglong ba ai jai jai kan sa wan phai ha kine ki khyndiat sngi.
Kane ka jingpynthikna kala mih shisien hadien ka jingkulmar kaba khie hapdeng ki paid Karbi bad ki Pnar ha kane ka shnong khappud ka Meghalaya bad Assam, kaba lam sha ka jingiap jong uwei u nong Karbi.
Kat kum ka jingong u Bah Sniawbha, kane ka jingjia kala jia ha ka jingleit otkba jong ki nongshongshnong ka thain, ka bym pat ju jia mynno mynno ruh bad ka dei ka bym don jiingiadei bad ka jingiakajia pud hapdeng ki ar Jylla.
Ula pyntip sha ki nongthoh khubor ba ki Myntri Rangbah jong baroh artylli ki Jylla kila dep iakren bad ki Regional Committee kin sa shim rai ia kaei kaba dei ban leh ha kaban pynbeit ia kane ka kam.
U Bah Sniawbha ula pyntip ba la dep bthah ia ki bor District ba kin iatreilang bad ki bor district na Assam, ban tehlakam ia ka jingiding kane ka jing jia.
“Kumba long mynta, ka jinglong jingman kala jai jai bad la lah tehlakam bad kyrmen skhem, kan sa long biang kumba ju long ha kine ki khyndiat sngi ban wan” ula ong haba pyntip ba ki Regional Committee kin ym pat rai ban iakynduh ha kane ka khyllipmat.
Haba kylli, u Bah Sniawbha ula pynshai ba katto katne ki jaka (na Khanduli sha Psiar) kiba don ha khappud ki dei kiba don hapdeng ka jingiakajia, hynrei kane ka jingjia kala jia ha ka jaka ka bym don satia ka jingiakajia pud. Ki Regional Committee jong ki ar jylla kin sa rai halor ka jinglong trai jong kane ka jaka.
U Symbud Myntri Rangbah ula pynpaw ruh ba ki kam leit otkba la pynsangeh shuwa ia mynta nhynrei kila don ki jing pyrshang ban pynthikna ba kin sa sdang biang kumba ju long hadien ka jingiakren.
“Ngi kwah ban pynthikna ba hadien ka jingiakren ha kine ki sngi ban wan, ka jingleit otkba kan sa sdang biang kumba ju long” ula ong.
“Ngi la peit thuh bha ia kane ka kam ban pynthikna ba ka jinglong jingman kan nym sniew shuh shuh” ong u Bah Sniawbha.
