Shillong, Risaw 09: Uwei u khynnah ba dang hynniew snem ka rta ia uba la tip kyrteng kum u Kyrshanbor Kharmudai uba la jah klep ha ka janmiet jong ka 8 tarik u Risaw na Lummarboh Block-4, Nongrah, Shillong hynrei tang hapoh arphew saw kynta, la lap noh ia ka met iap jong u narud surok ka khlaw Mawpat.
Ia ka met jong une u khynnah la lap na kawei ka jaka ba la tip kum ka Lum Rumnong hynne ka sngi Palei, kaba don harud surok marjan bad ka khlaw Mawpat ka ban poi sha NEIGRIHMS.
Halor ka jingjah une u khynnah, ki Pulit ka Rynjah Police Station kila pynlong ia ka jingwad bniah baroh shimiet ryngkat bad ki bor shnong bad ki paidbah nong shong shnong.
U Superintendent of Police Bah Vivek Syiem ula pynthikna ba kane ka jingiap u Khynnah ka dei kaba shah pyniap bad ka jingtohkit mynta kala iaid shakhmat.
“Baroh ki dak ki shin ki thew sha ka jingshah pyniap, bad ka kaiphod post mortem kan sa batai shai ia kum kiei ki dak mong” ong u Bah Vivek.
Ki Pulit kila pynlong ia ka jingtohkit kaba jur halor kane ka kam bad kila register ruh da ka case.
Ki Pulit ki lah ruh ban thaw ia ka kynhun Special Investigation Team (SIT), haba khmih ia ka jinglong jingman jong kane ka kam bymman.
“Ngin sa iashong namar kane ruh ka donkam da ka SIT naba u dei u Khynnah uba shah pyniap” ong u Bah Vivek.
Kat kum ka jingong jong u, ka jingtohkit ba dang shu leh malu mala ka pyni ba ia ka met la wan buh ha kane ka jaka ba lap ia ka.
Kane ka dei ka jingjia kaba ar ha kaba ki Khynnah kila jah na Nongrah bad la lap satang ia ki metiap.
Dang ha u bnai bala lah, uwei u Khynnah 13 snem ula shah ialam sha Juvenile Justice Board (JJB) namar ka jingkynnoh donkti ha ka jingiap jong I khynnah kynthei ba 4 snem ha Nongrah Nonglum Brei.
Ine u Khynnah kynthei ba kyrteng I Insaphira Lyngdoh Mawlai, ila jah nala iing ha ka step jong ka 14 tarik Nailur. Ia ka met jong I la lap na kawei ka iing ba dang shna ha ka 15 tarik Nailur.
Haba kylli, u Bah Vivek ula ong ba ka dang kloi palat ban ong ba ka don jingiadei hapdeng kine ki artylli ki case hynrei ki Pulit kin tohkit lang ia kane ka bynta.
“Ia mynta hi, ngam iohi ba kan don ka jingiadei. Hynrei ka jingtohkit kan iaid ban shem ia kiei kiei baroh” ula kular.
