Hap iatreilang ka Meghalaya-Assam ban tem ia ka jingjakhlia ka lyer ha Byrnihat : Sosthenes

Shillong, Risaw 06: U Myntri ka tnat Community & Rural Development (C&RD) Bah Sosthenes Sohtun u la pynpaw ba ka long kaba donkam eh ban don ka jingiatreilang hapdeng ka jylla Meghalaya bad Assam ban weng ia ka jingeh na ka jingjaboh ka lyer haki thain Byrnihat, Ri-bhoi District.

Haba kren shaki lad pathai khubor, u Bah Sosthenes u la iathuh ba na ka por sha ka por u ju pynpaw ia ka jingsngewkhia halor ka jingjaboh ba ki karkhana ha Byrnihat ki pynmih na ka por sha ka por.

Haba kdew ba bun ki karkhana ki la shah khang khyrdep, u la Myntri u la ban jur ïa ka jingdonkam ban don ka jingïatreilang hapdeng ka Meghalaya bad ka Assam ban weng ïa kane ka jingeh.

“Ka jingjaboh kaba mih kam dei tang na Meghalaya. Ngi don ki jaka haki thaiñ khapppud ba marjan bad ka Assam. Kumta, ngim lah ban ong ba ka jingjaboh kaba mih ka dei tang na Meghalaya” ong u Bah Sosthenes.

U Bah Sosthenes u la ban jur ia ka jingdonkam jong ka jingjurip lang hapdeng ki ar tylli ki bor Sorkar Jylla ban wanrah ia ka Plan kaba shai ban pynduna ia ka jingjaboh.

“Lada kam don ka jingwad bniah lang hapdeng ka Meghalaya bad Assam bad tad haduh ban da don daka Plan ban pynduna ïa ka jingjaboh, kan long kaba eh ban weng ïa kane ka mat haki thaiñ khappud Meghalaya-Assam” ula pynpaw.

U Myntri u la pynthikna ba ka Meghalaya State Pollution Control Board (MSPCB) kala shim ia ki sienjam kiba tyngeh ia ki karkhana kiba pynmih ia ka lyer jakhlia bad kiba pynkheiñ iaki kyndon ain.

Ka Byrnihat ka don hapdeng ka jing iakhun pyrshah ia ka jingjaboh ka lyer kaba jur bha, ha kaba dang shen ka IQAir kala kam baka Byrnihat ka dei ka jaka kaba jaboh tam ka lyer.
Ka Sorkar Meghalaya ka la shim khia ban weng ia kane ka jingeh, kynthup ka jingkhang ia ki karkhana kiba pynkhein ia ki kyndon pynjakhlia ia ka mariang bad ban dain kuna ia ki karkhana ki ba pynkhien ia ki kyndon.

Nalor kane, u Bah Sosthenese Sohtun u la batai ia ki mat ba kongsan jong u kum u Myntri ka Community & Rural Development (C&RD) da kaba banjur ia ka jingdonkam ka jingsynshar kaba biang ban pynjan bad ki paidbah, khamtam ha ki jaka nongkyndong.