Shillong, Nailur 13 : Ka HITO Sengkmie hynne ka sngi ka la pynkup burom ia u Bah Risakmen Dkhar ba dei nonghikai ha Sacred Heart Boys, Mawlai uba la lah ban pynmih ia ka kot iarap na bynta ki khynnah klas XII Science kaba u ai kyrteng, Physics – The Magic Book.
Shwa kane u president ka HITO Bah Donbok Dkhar u la pyllait paidbah ruh ia katei ka kot kaba u la pynlut haduh 22 bnai ban pyndep pura.
Haba kren bad ki lad pathai khubor u Bah Risakmen u la ong ba ka jingthoh jong u ia ka kot kadei namar u kwah ba ki samla ka Jylla kin lah ban lehbha ha ka jingpule khamtam ha katei ka sobjek.
“Ha ka por ba wan ka khlam COVID nga ruh nga ngat ha ka khlam kumta nga la pynlut por ban thoh kane ka kot sngi bad miet. Bun ki samla ki shem jingeh ban leit khreh kot shabar namar ka daw u COVID kumta nga thoh ia kane ka kot ban pynsuk ia ki khynnah,” u la ong.
U kyntu ia ki nonghikai ba kham stad ba kin thoh shuh shuh kham bun ki kot ban pynsuk ia ki kot kumba leh ha Kerala ba ki thoh kot ha ka Ktien lajong na bynta ban pynsuk ia ki samla pule.
U ong ruh ba katei ka kot kan long kum ka kot iarap ryngkat ki jubab ban pynsuk lut ia baroh kaba wat u khynnah uba kham duna ka jingshemphang ruh un lah.
Kum u briew nga kwah ban noh synñiang lem na ka bynta ki samla pule jong ngi ban pynsuk ia ki ha ka jingiaid lynti jong ki ha ka pule. “Shwa ba phin jam shakhmat ne leit coaching sngewskhem bad shaniah shwa halade,” u la ong.
Kum ka jingsdang u la pyntip ba u la phah shon 250 kopi bad lada don kiba dang kwah un sa phah shon shuh. Namar ha kaba sdang u pyrkhat tang na bynta ki khynnah lajong hynrei mynta pat ki la sdang ban wad.
Ia katei ka kot u la pyntip ba u la pyllait paidbah hynin ka sngi bad u la dep ruh ban ai kopi sha ki stad Physics.
