Shillong, Risaw 03: Ka Rangdajied United FC ka la pynliem ia ka Malki SC da 4-1, ha ka lympung ialehkai Shillong Premier League 2025, bad lah ruh ban ong ba kane ka dei ka jingjop kaba ka kynhun ka donkam bha ha kane ka kynti iakhun kaba mynta.
Kane ka dei ruh ka nam jop kaba ar ia ka Rangdajied ha kane ka samoi ialehkai hadien ka jingjop ba shisien, iakhaid 3 sien bad ban shah rem 2 sien. Ka Rangdajied mynta kala ioh khur 9 point bad ban kiew sha ka kyrdan kaba 6 ha ka miej iakhein point.
Ia kine ki saw tylli ki kol ka Rangdajied United FC lah ioh thep da u Denelson Pyngrope (16’P), Pasborlang Khonglikong (64’), Wansiewdor Nengnong (76’) bad Freddy Jyrwa (79’).
Katba ia ka shi kol ka Malki SC la thep ia ka da u by Hilford Lyngkhei (39’).
Kaba kham pynhun ia ka mynsiem ka kynhun ialehkai ka Rangdajied United FC ka long ba na ki hynriew sien iakhun ba ka la dep, ka la lah ba kan ioh thep tang saw tylli ki kol, kaba wat la katta ban dang iakhun ia ka thong ban ioh ban rah ia ka nam kum ka lahduh, ka long ka lynti kaba jngai bah, hynrei long katba ka long, kum ka kynhun, ka thong ba ka hah eh hakhmat ia ka mynta ka long ba kan ialeh katba lah ban ioh ban kynjoh sha ka kyrdan ka Top 6, kaban plie lad pat ia ka ba kan ioh ia ka kabu ba kan iakhun pat sa ha ka lympung iakhun jong ka SSA Super Cup, kaban long hadien ba kut jong ka SPL.
Lashai pat ka sngi ka kynhun ialehkai ka Mawlai kan hiar ba kan mih madan ba kan iakhun pyrshah ia ka Laitkor SC, kaban long ha ka por 4:30 nohphai sngi.
Kaei kaba ka Mawlai SC ka donkam na kane ka jingiakhun ka long ka jingjop, kaba wan hadien ba ka dang shu dep ba kan shah liem noh hakhat ka Shillong Lajong FC.
Katba na ka liang ka kynhun ialehkai jong ka Laitkor kan sngewskhem bha ialade ha kane ka kynti kaba mynta hadien ba ka la jam shakhmat ban ioh khur ia lai sien lynter ki nam jop ki jong ka.
