Shillong Risaw 01: Ka Shillong Lajong kaba la shah thep nyngkong haduh 3 kol, kala lah ban wanphai nadien pat ban khur syndon ia ka jingjop da kaba pynrem da 4-3 ia ka Mawlai ha ka jingiakhun jong ka Shillong Premier League ha ka sngi Balang.
Mar ia sdang ka jingiakhun ha ka kylla step, ka Mawlai kala ioh ban thep ia ka kol lyngba u Samlang Rympei ha ka minit kaba 22 ha kaba kala leit dei ia u nongialehkai shadien jong ka Lajong bad u nongap kol u Wanteilang Malngiang um shim la lah ban leh eiei.
Haba ka jingiakhun kala sdang ha ka kylla miet, ka Mawlai kala bteng ban ioh thep sa 2 kol lyngba u Fairming Suting ula thep ia ka kol ha ka 46 minit bad u Loving Suting ula thep kol ha ka minit kaba 53.
Watla ka Mawlai kala thep 3 kol, hynrei ka jingiakhun kala long kaba itynnad haba ki nongialehkai ka Lajong kim shym la duh mynsiem hynrei kila bteng ban ialehkai bha bad kila lah syndon ban thep 4 kol ha ka kylla miet, ha kaba u Emanbha Marbaniang ula thep ia ka kol ha ka mnit kaba 58 bad 67 bad u Deibormame Tongper ula thep ia ka kol ha ka minit kaba 64 bad 80 kaba la pynthikna syndon ia ka Lajong ban khur ia ka jingjop.
Da kane ka jingjop ka Lajong kala iaryngkat bad ka Mawlai da kaba ioh mar 12 point hynrei kala tam pat ha ka jingioh thep kol. Ka Nangkiew Irat kala bteng ban bat ia ka kyrdan da kaba ioh 13 point.
Ka jingiakhun ha ka SPL 2025 kan bteng biang ha ka sngi Thohdieng ha kaba ka Malki kan iakhun pyrshah ia ka Rangdajied United ha ka por 4:30 nohphai sngi.
