Shillong Nailur 28: Ka Mylliem Lum kala ioh rah ia ka nam Lahduh jong ka lympung ialehkai Second Division 2025 ka Shillong Sports Association da kaba pynrem ia ka Laitkyrhong ha ka final da 4-3 lyngba ka jingshut penalty ha SSA Stadium ha First Ground, Polo ha ka sngi Saitjain.
Kine ki ar tylli ki kynhun kiba la ioh rung sha ka final, kila shah kyntiew kyrdan ban leit iakhun noh ha ka First Division ha ka samoi ban wan.
Ka Mylliem Lum kala jop ha baroh ki 6 tylli ki jingiakhun ki jongka hynrei ka jingiakhun ia ka Final kala long pat da kumwei bad wat ka Laitkyrhong kam shim la mad ia ka nam rem hynrei kala iakhaid pat arsien ha ki jingiakhun ha ki jingiakhun ha ka Group.
Ka jingiakhun ia ka Final kala kut ha ka jingiakhaid ha kaba kine baroh artylli ki kynhun kim shim la lah satia ban thep kol kumta la pynialehkai sa ia ka Extra Time kaba kine ki kynhun kim shim la lah ban thaw ia kano kano ka kabu kaba biang ban ioh thep kol kumta ban rai ia ka nam lahduh ne nongjop la pynlong ia ka jingshut ia ka Tie Breaker.
Ka Laitkyrhong kala sdang ia ka jingshut da kaba ioh thep ia ka kol hynrei haba kala leit shut ha ka sien ka baar, u nongap kol ula ioh ban iada ia ka bol ban rung shapoh kol bad haba kila leit shut ia ka penalty ha ka sien kaba saw kala leit beit beit sharud bad kumta ka Mylliem kaba la thep lypa 3 kol kala donkam ban thep ia ka kol ha ka sien shut kaba saw hynrei u Shaitborlang Kharkrang uba la ioh ban thep bun kol tam ha kane ka samoi ialehkai haba ula leit shut ka bol kala leit dei ia u diengkol bad kala mih noh shabar. Dei lyngba u Baniaineh uaba la the pia ka kol ban pynthikna ia ka Mylliem ban rah ia ka nam lahduh da kaba pynrem ha ka tie breaker da 4-3 ia ka Laitkyrhong.
U Baniaineh ula ioh ia ka khusnam ‘Player of the Final’ ha ka jingsam khusnam bad ula ioh pdiang ruh ia ka khusnam ‘Top Scorer’ halor ka jingioh thep 8 kol ha kane ka samoi ialehaki.
U President ka Meghalaya Football Association u Bah Hamletson Dohling kum u kongsan ryngkat bad ki nongialam ka SSA kila sam ia ka khusnam kaba T.1 Lak sha ka Mylliem Lum katba ka Laitkyrhong kala ioh ia ka T.50,000.
Hadien ba ka jingiakhun jong ka Second Division kala kut noh, ka SSA kan pynlong noh ia ka First Division 2025 naduh ka sngi Nyngkong. Ka jingiakhun kan long hapdeng ka Meghalaya Police pyrshah ia ka Nongrah ha ka por 1:30 mynsngi. Hadien kane yn pynlong ia ka Shillong Premier League 2025 hapdeng ka Malki pyrshah ia ka Nangkiew Irat ha ka por 4:30 nohphai sngi.
