Shillong, Nailur 26: Kum shi bynta jong ka Swasth Nari Sashakt Parivar Abhiyan kaba dang ïaid shakhmat ha kylleng ka Ri, u Lat ka Jylla Meghalaya u CH Vijayshankar u la leit jurip iaka Barapani State Dispensary Ri-Bhoi District ha kaba u la ia kynduh bad ki longkmie kiba ioh jingmyntoi, ki nongtrei ka jaka sumar bad ki nongtrei mon sngewbha ha ka imlang sahlang.
Ha kane ka sngi la don lang u Deputy Commissioner ka Ri Bhoi district u Abhilash Baranwal, u A.R. Marak District Medical & Health Officer, u Raja Brahma, u Additional Deputy Commissioner bad u Dr. N.E. Kharsahnoh, Director of Health Services (MCH&FW), ki nongtrei ASHA, ki nongïoh jingmyntoi, bad kiwei ki riew rangbah.
Ha ka jingleit jurip iaka Dispensary u Lat ka Jylla ula sam da ki khoh jhur sha ki longkmie ba armet, bad ki Sanitary pads kum shi bynta ka dak ban iarap iaka bha miat jong ki samla kynthei.
Haba kren ha kane ka sngi u Lat ka Jylla u la pynpaw ia ka jingdonkam jong kane ka jingthmu, da kaba pynshlur ia ki nongshong shnong ban pyndonkam pura ia ki jingshakri ha ka koit ka khiah ba la ai hapoh ka Swasth Nari Sashakt Parivar Abhiyan.
U Lat u la ban jur ba ka Campaign ka dei ka sienjam kaba kongsan bha da ka Sorkar India ban kyntiew ïa ka koit ka khiah bad ka jingbha jingmiat jong ki kynthei, ki khynnah, bad ki longïing lyngba ki jingsumar bad eksamin khlem jingsiew, ka jingpynsngewthuh shaphang ka jingbam, bad ka jingsumar ban ïada na ka jingpang.
Ka Swasth Nari Sashakt Parivar Abhiyan kaba la sdang ha ka Ri baroh kawei kaba la sdang naduh mynshem bnai, ka thmu ban pynkhlain ia ka jingai jingsumar lyngba ka jingiatreilang bad ki paidbah, ka jinglap kloi ia ki jingpang, bad ka jingkyntiew ia ki rukom bam bad jinglehkhuid, khamtam ia ki kynthei bad ki khynnah.
