Khot u DyCM ia ka jingialang ban iasyllok ia ka soskular iasuk ka ANVC, ANVC-B

Shillong, Nailur 25 : U Symbud Myntri Rangbah ki kam Pohiing (Police) Bah Prestone Tynsong ula khot ia ka jingialang la sngi Thohdieng ban iakren halor ka jingpyntreikam ia ka soskular iasuk bad ki kynhun bala pynduh pyndam-ka Achik National Volunteer Counci (ANVC) bad ANVC-B bala iasoi ha ka 24 tarik Nailur 2014.

Ha kane ka jingialang yn wan ban iashimbynta da u Chief Executive Member (CEM) bad DyCEM ka Garo Hills Autonomous District Council (GHADC) bad phra ngut ki nongialam jong kine ki kynhun ba la pynduh pyndam ba kynthup ia u Chairman ka ANVC Dillash Marak bad Chairman ka ANBC-B Bernard N Marak.

Ha ka 20 tarik Nailur, ka Sorkar Meghalaya ka la pan T. 664.49 klur kum ka jingkyrshan pisa na ka Sorkar Pdeng ia ka GHADC hapoh ka soskular iasuk ka ANVC bad ANVC-B.

Na kane, T.252 klur la pan ban pyllait noh ia ka tulop ba sahteng haduh 43 bnai jong ki nongtrei ka GHADC.

Ha ka shithi bala phah sha u Secretary ka Ministry of Home Affairs (MHA), u Commissoner & Secretary ka Tnad Plannong, Investment Promotion & Sustainable Development Dr Vijay Kumar D ula pyntip ba ka Ministry of Environment Forest and Climate Change kala dep mynjur ia ki project ba iadei bad ki kam khlaw, ia kaba la mang T. 308,14,27,382.

Ki DPR ba iadei bad ka jingpyndait ia ki solar street light, ka jingshna ia ki Iew Nongkyndong bad ka jingkyntiew ia ka kam thung soh bad ka jingpynmih ia ki mar ki mata, ruh la ailang ia kaba ka mang tyngka ka long T.104.34 klur.

Hadien kane, u Bernard N Marak uba dei ruh u MDC ka BJP na Tura, ula ban jur ia ka jingdonkam ba ka Sorkar kan pynlong ia ka jingialang jong ka Monitoring Committee bad ban thung ruh ia ka State Finance Committee kat kum ka Garo Accord.

Ula kynnoh ba ka Sorkar Jylla kala shu ieh la slem ia ka jingpyntreikam ia ka soskular iasuk kaba lam sha kane ka jinglong jingman ba mynta ha GHADC.