Shillong, Nailur 23 : Uwei u contractor ryngkat ki Engineer ka Tnad PHE bad ki Inspector Third Party ba dei khmih ia ka skhim JJM, kila shah mudui ejahar halor ka jingkynnoh bamsap bad trei bym hok ia ka skhim JJM ha ka shnong Gare Songmong bad ki shnong ba marjan.
Ia kane ka ejahar la mudui da uwei u nongshongshnong ka Gare Songmong, South Garo Hills u Tengba Marak, uba la leit buh ia kane ka ejahar ha Nangalbibra Police Station ha ka sngi Ba-ar.
“Nga kyrpad ba phin register ia kane ka ejahar pyrshah ia kine ki briew ba kynnoh, pynlong ia ka jingtohkit kaba bniah bad ban leh da kaba tyngeh kat kum ka ain” ong u Tengba Marak,
U Tengba ula kynnoh “Ba hapoh ka skhim ka Sorkar Jal Jeeval Mission (JJM), ia ka project sam um bam la mang bad pyntrei ha ka shnong Gare Songmong bad ki shnong ba marjan, Hynrei, u contractor, ha ryngkat ka jingiasuhbuit bad ki briew ka Tnad PHE Williamnagar bad u Inspector ka liang manla ba lai, kila ia bam klop ia ka pisa bad trei bym hok ia kane ka project”.
Ula kynnoh ruh ba ki pipe bala siang ki dei kiba tad dor, ki jingtei kiba shu shna torti bad bun ki longiing kin dang ban ioh ia ka kor um ha iing watla ka Tnad PHE kala dep ban ai ia ka syrnot bala pyndep ia ki kam. Ula kynnoh ba ia ka pisa bala mang da ka Sorkar la pyndonkam bakla bad ka jing pyntrei ia ka project ka long tang ha ki kot ki sla hynrei ki paidbah kim pat ioh satia ia ka umbam umdih kaba shngain.
U Tengba ula kdew ruh ba ki top um bala pyntrei la shu ieh khlem um bad ka ktieh bad u shyiap ula dap ha kane ka top bad la iohi ruh wat ia ki niut kiba la mih hapoh. U pyntip ba naduh ba dep shna ia kane ka top, kam pat ju poi um satia.
“Kine ki briew kila phah soi kyrteng ia ki nongshongshnong ba kin ioh sei ia ka pisa khlem da iaid kat kum ka lynti kaba dei” ula kynnoh haba ban jur “Kane ka pyni shai ia ka jingthmu bamsap, leh thok, shet shukor bad pyndonkam bakla ia ka pisa u paidbah da une u contractor, ki briew ka PHE bad u Inspector, kiba dei ban shah pynsajia kat kum ka ain”.
