Shillong, Nailur 23 : U Myntri ka Tnad Pule Puthi Bah Lahkmen Rymbui ula kyntait ban ai ia kano kano ka jingkular sha ki nonghikai Adhoc ba iakhih da kaba ong ba ka Sorkar kan bishar shuwa ia ki jingai jingmut bapher bapher haba iadei bad ka jingtyrwa ban pynbeit ryntih ia ki kyrdan jong ki skul ha Jylla shuwa ban shim rai.
Ia kane la pyntip da u Vice President ka Federation of All School Teachers of Meghalaya (FASTOM) Bah S Jungai hadien ka jingiakynduh bad u Myntri ha ka sngi Ba-ar.
U Bah Lahkmen ula khot ia ki nongialam ka FASTOM ban iakren hadien ba ki la pynsdang ia ka jing iakhih da kaba iashong kyllain mungor naduh ka sngi Nyngkong, ban dawa kyntiew kyrdan noh ia ki skul Adhoc sha ki Deficit.
Haba kren sha ki nongthoh khubor, Bah Jungai ula ong ba u Myntri ula ai ktien sha ka kynhun ba ka rai ban kyntiew kyrdan ia ki nonghikai adhoc sha ki deficit kan shong eh ha ka review committee bad ka jingai jingmut jong ki kynhun bapher bapher.
“U Myntri ula pyntip sha ngi ba ka Sorkar bad ka Tnad ka ithuh ia ka jingshakri bad ka synniang jong ki nonghikai adhoc ia ka Jylla hynrei haba phai sha ka jingdawa jong ngi, ka Sorkar kan dang bishar bniah ia ki jingai jingmut bala ai da ki kynhun bapher bapher, ki seng sain pyrthei bad ki management committee jong ki skul. Hadien ba dep bishar ia ki jingai jingmut, kin sa shim ia ka rai. Kane ka mut ba ka Tnad ia mynta ka dang khmih ia ka kam ban pynduna ia ka jingdon bun kyrdan ki skul” ula ong.
Ula pyntip ba u Myntri ula kyntait ban ai ia kano kano ka jingkular la ka Sorkar kan mynjur ne em ban kyntiew kyrdan ia ki skul adhoc sha ki deficit naba kane kan shong ha ka review committee bad ki jing ai jingmut jong ki kynhun bapher bapher.
Haba kylli, u Bah Jungai ula ong ba ka FASTOM ka ieng skhem halor ki jingdawa jong ka ban kyntiew kyrdan sha ka deficit lane, la kumno kumno ruh ka deficit pattern, kaba kynthup ia ka basic pay bad ka dearness allowances (DA).
U Bah Jungai ula pynpaw ba lada ka Sorkar ka kular ia ka pay scale bad ka tarik ba thikna ban pyntreikam ia ka, ki lah ban shim ia ka kum ka sienjam kaba biang.
“Lada ka Sorkar ka lah ban kular ia ngi ba naduh kano ka tarik lane ka 1 tarik Kyllalyngkot, kin ai sha ngi ia ka pay scale, ngin da kmen eh tang ia kane ruh” ula ong.
U Bah Jungai ula pynpaw ruh ba u Myntri Rangbah uba bat ruh ia ka pla tyngka, u donkam ban shim ia ka rai halor kane ka kam, namar kam dei satia tang ka kam jong ka Tnad Pule Puthi.
Halor ka jingmih na ka jingialang, u Bah Jungai ula pynpaw ba ka FASTOM kan sa iasyllok shuwa bad ki dkhot ha madan Malki bad ha ri-lum Garo ban shim rai ia ka sienjam ba kin shim nangne shakhmat.
“Kan shong ha ka rai jong uba bun balang la ngi pynsangeh noh ne em ia ka jingiakhih” ula bynrap.
