Jowai, Nailur 20: Ka Kiang Nangbah Government College, kaba dei ka jaka pule kaba pawnam ha rilum Jaintia, hynne ka sngi Saitjain, kala rakhe ia ka jingdap 59 snem ka jongka ha kaban ai jingshakri ban pynnang pynstad ia ki samla ka thain.
U Symbud Myntri Rangbah ka jylla u Bah Sniawbhalang Dhar ula long kum u kongsan ha kane ka jingrakhe ia ka Foundation Day.
U Principal jong ka Kiang Nangbah Government College u Dr. L.M. Darnei ula pyntip ba ka college ia mynta hi ka don 3,126 ngut ki samla pule na ki 15 tylli ki shnad pule.
Ula pynpaw ba kane ka jaka pule kala nang kiew katba nang mih ki snem bad ula iaroh ia ka jingtrei shitom met bad mynsiem jong ki nonghikai bad ki nongtrei.
Haba kren ha ka jingialang u Bah Sniawbhalang Dhar ula iaroh ia ka jingnoh synniang jong ki Principal kiba rim bad ki nonghikai bad ula ong ba kila leh ia ka bynta kaba khraw ha kaban kyntiew shajrong ia kyrdan ha ka pule puthi ha ka thain.
U Bah Dhar ula pynthikna ban ai 50 tylli ki Laptop sha ki nonghikai hapoh jong u bnai Risaw 2025 bad ula kyntu ia ki samla pule ba kin aiti ialade ha ka jingpule khnang ba kin lah ban kiew shaphrang ha ka jingim ka jongki.
Nalor kane ula pyntip ruh ba la pynkhreh ia ka Detailed Project Report (DPR) kaba T.25 Klur na ka bynta ban pynbha bad pynitynnad ia ka college.
Ha kane ka sngi u Bah Sniawbhalang ula plie ia ki jingtrei ban pynitynnad ia ka college bad ia ka jaka pynieng ia ki thuk thuk ha katei ka college.
Ha kane ka jingrakhe la pynkup burom ruh ia ki samla pule kiba la ioh bat ia ki kyrdan kiba shakhamt ha ka NEHU bad ka jingpynkup burom ia ki nongtrei kiba la trei palat ia ka 25 snem bad ia ki samla pule kiba rim kiba la ioh ia ka kyrdan PhD.
