Shillong, Nailur 12: U Myntri ba khmih ia ka Tnad Taxation James K Sangma hynne ka sngi Nyngkong, ula ong ba ka Meghalaya Regulation of Gaming Act and Rules 2021, ka don ia ki “jingiada pa pura” ba khanglad ia kino kino ki jingktah na ka jingithuh da ka ain ia ki jaka pynkhalai, ia ki trai shnong ka Jylla.
“Nga kwah ban ban jur ba kine ki jaka khalai kim dei ki jaka na ka bynta ki trai shnong, ki dei kiba la buh thik tang ia ki hehspah (nong India ne Nongwei) kiba kwah ia ki lad jingpynbyrngia kum ka khalai haba ki wan kai sha Jylla na ki kam jngohkai ne kam business bad kiwei kiwei” ong u James haba jubab ia ka Call Attention Notice bala wanrah da u Chief Whip ka Liang Pyrshah bad MLA ka Umroi Bah George B Lyngdoh hapoh ka Dorbar Synrai.
U James ula ong ba ki Trai Shnong kin shu ioh tang ia ki jingmyntoi na kine ki jaka khalai kata da ka jingiohkam iohjam, kyntiew ia ka Riti tynrai lajong, ki jain thain kti, ki jingbam jingdih bad kiwei kiwei lyngba ki jingshad nala tynrai, ki jingput jingtem, ki jingbam nala tynrai bad kiwei kiwei.
Ia kane ka kam la wanrah namar ka jingieng pyrshah jong ka Joint Action Committee against Casino (JACAC), ba la thaw da ki Sengbhalang bad ka Synjuk ki Rangbah Shnong, ban pyrshah ia ka jingbuh Casino ha Ri Bhoi District.
U James u iathuh ba ka tnad Taxation kala dep pynmih ia ka Rules jong ka Act bad la buh ruh ha ka rynsan paidbah haba kyrkad ia ki riew paidbah ban ai ia ki jingai jingmut lada ki don bad la pynmih ruh ia ka Public Notice ha ki kot khubor phareng bad Khasi myn ha ka 27 tarik Nailar 2021.
Hynrei, namar ka jingbym iohpdiang ia kano kano ka jingkynthoh na ki paidbah, ka Tnad kala notify ia ka Rules da kaba pynrung lang ia ki lad jingiada bala kdew hapoh ka Act.
U James ula ong ruh ba ka Sorkar Jylla haba thaw ia ka Meghalaya Regulation of Gaming Acts and Rules, 2021 kala shim ia kajuh ka sienjam ban nym shah satia ia ki trai shnong ba kin rung ha ki jaka khalai da kaba pynrung ia ka kyndon ha kane ka ain.
U la kdew ia ka Rule 19 (x) ba shah rung sha ki jaka khalai tang ia kito ki briew ba don ia ki ID proof kiba dei na shabar ka Jylla Meghalaya, kaba mut ba ki trai shnong ka Jylla kin ym iohlad satia ban rung ha kine ki jaka ia khalai.
Haba pynpaw baka Jylla kala shah kyrkhu da ka jingitynnad ka mariang, hynrei u Myntri ula ong ba ka Sorkar kala shimkhia ruh ba kiwei ki Jylla ba marjan kila sdang ban iakhun ban kyntiew ia ka kam jngohkai hala ki jong ki Jylla ha kaba ki don ruh kiba don ia kijuh ki jingiatynnad ka mariang nalor ka jingdon ia kiwei pat ki jingkhring kiba don ia ki jingtei ba don ia ki khana pateng, ki buit architech bad kiwei kiwei.
“Namar kata,ka Sorkar Meghalaya ka hap ban wad ia ki lad ki lynti ban khring ia ki nongwan shangkai ym shuh tang ia kiba shu wan sngewbha, kiba duna pisa hynrei ia kiba heh spah kiba lah ban pynlut bun” ula ong.
U Myntri ula pynkynmaw ruh ba ki jingiakhalai ba bun rukom ki dei kiba la don naduh kulong kuman haba ong “Ngin shukor ialade lada ngi kyntait ba ki jingiakhalai kim don satia ha Meghalaya”.
Kat kum ka jingong jong u, ka jingiathong pisa ha ka kam siat khnam ka dei kaba la pynlong ain ha Jylla naduh u snem 1982 bad kala don wat hashuwa ban ithuh da ka ain, kaba pynbor ia ki sorbar barim ban buh kyndon da kaba thaw ain namar ban shu khang kam dei satia ka lynti.
U Myntri ula kubur ruh ba ka dei ka jingshisha ba ka jingiakhalai ha ki jingialehkai kum ka iadur masi (ba la khein beain) iapuh syiar, khalai kynroh bad kiwei kiwei ki dang iai bteng haduh mynta ha ki jaka nongkyndong jong ka Jylla.
U James ula kdew ruh ba ki Jylla kum ka Goa bad ka Sikkim kila kyntiew ia ka kam jngohkai lyngba ka jingpynlong ain ia ka kam khalai hynrei ban pynkiar ia ki trai shnong na ki jingma kiba ap na kine ki jingialehkai khalai, kila wanrah ia ki kyndon hala ki jong ki Gaming Act ba khang ia ki trai shnong ba kin rung ha ki jaka khalai.
