Shillong, Nailur 17 : Ki Pulit ka East Khasi Hills, kila kem ia u Khynnah 13 snem bad phah sha ka Juvenile Justice Board (JJB) halor ka jingdon bynta ha ka jingiap jong I Khynnah kynthei ba 4 snem ha Nongrah Nonglum Brei, Shillong.
Kat kum ka jingong u Superintendent of Police Bah Vivek Syiem, une u Khynnah, uba sah marjan bad ba ju leit bha sha ka Iing ine I Khynnah, ula kubur b aula ialam ia ine I Khynnah kynthei sha kane ka iing ba dang shna, ka jaka ba lap ia ka metiap ha ka 15 tarik Nailur.
Ine I Khynnah kynthei ba kyrteng I Insaphira Lyngdoh Mawnai, ila jah rngai nala ka jong ka phyllaw iing ha ka por 8 baje mynstep jong ka 14 tarik Nailur.
Ka jingtohkit ki Pulit ba khlieh da ka Special Investigation Team (SIT) hapoh ka jingialam u SP (City) Bah Herbert Kharkongor, kala pynpaw ba une u Khynnah ula ialam ia i Insaphira sha kane ka Iing ba dang shna, bad ula syntuid bad ioh tan lang ia I Insaphira sha ka thliew ba lang um, kaba lam sha ka jingngam jyllop.
Ka kaiphod post mortem ka pynthikna ba ka daw jong ka jingiap ka dei na ka jingnguid um, bad kam don sakhi satia ia kano kano ka dak mong ne ka jingshah ktah ka longryngieng.
Ha ka jingtohkit ka SIT, une u khynnah ula phla ba u ialam ia I Insaphira sha katei ka jaka bad pyrshang ruh ban ialam bakla da kaba thaw khana halor ka kali scorpio rong iong bad ki briew ba deng mask.
“La phah ia u sha Juvenile Home hynnin ka sngi ban peitthuh. Hynne ka sngi la ialam phah khmih ha ki doktor bad leh ruh ia ki test bapher bapher ia une u Khynnah. La ialam ruh ban bishar hakhmat ka Juvenile Justice Board” ong u Bah Vivek haba iakren bad ki nongthoh khubor ha ka sngi Balang.
“Ia ka kaiphod post mortem ruh la ioh pdiang hynne ka sngi bad kala pynpaw ba ka daw jong ka jingiap ka dei namar ka jingngam jyllop. Kam don don mong satia ha ka met, kam don satia ka jing jrong kti ia ka longrynieng jong u bad ka jngiap kala long hapdeng 24 haduh 36 kynta na ka por ba leh ia ka post mortem, kaba pynpaw ba ka jingiap kala jia ha katei ka jaka ym sha kiwei pat ki jaka” ula ong.
Nalor kane, u SP ula ong ba ka SIT kan nang tohkit shuh shuh ia ka jingkam une u Khynnah ban pynshisha la ka dei kaba shu jia ryngkhat lane da kiwei kiwei.
“Ka SIT ka don 90 sngi ban tohkit ia kane ka case. Ia mynta kaei kaba ngi la pynshisha ka long ba u dei une u khynnah uba ialam ia I Insaphira sha kane ka jaka. Kala pynshisha ruh ba kam don satia ka jinglute namar ki sohskhor ksiar jong I ki khlem jah satia. La pynshisha ruh ba kam shym la don ka jing jrong kti ia ka longrynieng jong I bad pynshisha ruh ba kam shym don dak mong ha ka met. Ka kaiphod post mortem ka pyni ba ka jingiap ka dei na ka jingngam jyllop” ong u Bah Vivek.
Haba kylli, ula ong “Ngi donkam ban nang wad shuh shuh la ka jingleh une u khynnah ka don da kano kano ka daw. Ngi donkam ban wad shuh shuh la ka don eiei sha lyndet”.
 halor ka jingdon bynta ha ka jingiap jong I Khynnah kynthei ba 4 snem ha Nongrah Nonglum Brei, Shillong.){kind=link}