Shillong Nailur 17: U Nongialam jong ka seng United Democratic Party (UDP) u Bah Metbah Lyngdoh ula shimti kum u Myntri ba khmih ia ka tnad Power, Taxation, Water Resources Development bad Textile Department.
Haba iakren bad ki nongthoh khubor ula pynpaw ia ka jingsngewhun halor ka jingbhah kam ia u bad ula ong, ba kine ki tnad kiba un khmih kidei kiba jwat bha.
“Kano kano ka tnad kadei kaba jwat bha. Ka tnad Bording kadei ka tnad kaba thymmai ia nga, kumta hap ban pule bniah bha halor kane ka tnad” ula ong.
Ula kubur ia ki jingeh kiba sahteng kiba la mad da ka tnad bording khamtam eh ia ka MeECL, u Bah Lyngdoh ula ong “La sngewthuh ba ka long kaba jwat bha bad kam dei satia ka kam kaba tang shi sngi”. Ula banjur ia ka jingdonkam ban kynthup lang ia baroh bad ban wad ia ki lad ban lah ban pynbeit iaka jingeh.
Ha kaba ia dei bad ka Tnad Taxation ne Khajna, u Bah Lyngdoh ula pynshai ba ka long kaba kongsan ban bud ryntih ia ka Tax Act khamtam ia ka GST.
“Phi iohi ia kito kiba kiar ban siew ia ka khajna baroh, nga tharai ka jinglong jingman ka khajna mynta, ha kaba iadei bad ka GST, ym don ba lah ban kiar ha kaba iadei bad ka jingsiew” ula ong.
U Nongialam ka UDP ula iengskhem ruh ba ka seng kala shim ia ka rai ban bujli ia ki myntri kadei kaba la shim lang da baroh.
Katkum ka jingong ka jongu, u MLA ka West Shillong u Bah Paul Lyngdoh bad u MLA ka Khliehriat u Bah Kyrmen Shylla, kiba la shah pynhair shuki noh kum ki myntri sorkar kidei kiba donbynta lang ha kaban ia shim lang ia ka rai.
“Nga sngewskhem ka jingmut ba kitei (Paul Lyngdoh bad Kyrmen Shylla, kiba la shah pynhiar na ka shuki Myntri) ki kmen bad kaba bha tam kaba lah ban leh ka long ban leit ban kylli hi na ki. Nga tharai katei kadei ka lynti kaba biang tam. Ki (Paul and Kyrmen) dei kiba donbynta lang ha kaban shim ia ka rai” ong u Bah Lyngdoh.
“Ka seng ka long kaba iar bad kaei kaei ka rai kaba ka shim, kadei beit ka rai jong ka seng, kam dei satia ka rai kaba la shim marwei da u President ne u Bah Lahkmen Rymbui,” ula pynshai shuh shuh.
La ka rai kadei kaba la pynshong nongrim ha ka rukom treikam, u Bah Lyngdoh ula ong “Em Sir, Nga tharai ka rai ka long kaba shai kdar. Kam shim la don kano kano kaba la kdew shaphang katei bad kam shim la don hangno hangno ruh ia kaban yn iatai ruh. Ym donkam ban leit sha kitei kiei kiei baroh namar kam long kaba donkam ban pynmih ia kiei kiei ki bym shim la don eiei satia”.
Haba kubur ba kam shym la don kano kano ka jingiapait hapoh ka seng UDP, u Bah Metbah Lyngdoh ula ong, “Kadei ka jingpyrshang ka jong nga bad nga lah ban ong ba kadei naduh ka sngi kaba nyngkong kaba nga la shimti kum u President ka long ban pynthikna ba ka seng kadei ban long kaba iatylli kum kawei bad kan ieng mynta kum ka seng kaba iatylli namar ka jingiatreilang kum ka kynhun kaba ngi don ia ki paralok kiba don burom hapoh ka iingdorbar thawain kiba dei shibynta jong ka seng bad kidei ruh ki nongkitkam ka seng bad kiba don haduh mynta ha ka seng”.
“Nga kwah ban kren da kaba shai. Kane kam dei ka rai jong u Bah Lahkmen Rymbui ne Metbah Lyngdoh kum u President. Ka rukom treikam ka seng ka long kaba iar bha. Haduh mynta ngi long kumba ngi long kadei namar ka jingiatreilang kum ka kynhun namar ba ngi don ia ka jingiatreilang kaba iajan bad ka jingiasngewthuh jingmut. Dei na kata ba baroh 12 ngut ki MLA ngi ia skhem bha. Ngi lah ban don iaka jingiapher ha ka rukom pynsngew. Ki pynpaw ia ki jingpynsngew ki jongki khnang ban pyni kumno ban pynskhem shuh shuh iaka seng. Kumba long haduh mynta kano kano ka rai kaba la shim na ka bynta jong nga bad u Bah Rymbui ban shimti kum ki Myntri kadei ka rai jongka seng, ia kaba la sakhi da man la uwei pa uwei uba don bynta ha ka seng” ula pynkut.
 u Bah Metbah Lyngdoh ula shimti kum u Myntri ba khmih ia ka tnad Power, Taxation, Water Resources Development bad Textile Department.){kind=link}