“Ka jingweng ia u Bah Paul bad Bah Kyrmen na ka shuki Myntri ban iohlad lem kiwei ki MLA”: Metbah

Shillong, Nailur 16 : U President ka United Democratic Party (UDP) Bah Metbah Lyngdoh ula ong ba ka rai jong ka party ban weng noh ia u Bah Paul Lyngdoh bad Bah Kyrmen Shylla kum ki Myntri Sorkar, ka dei ka sienjam kum ka jingpyrshang ban iasam lem ia ka jingkitkhlieh hapdeng ki Nongthaw Ain jong ka party.

Ka UDP ka don 12 ngut ki MLA ha ka Iingdorbar ba don 60 ngut ki MLA.

Haba kren sha ki lad pathai khubor hadien ka jingbam smai kum u Myntri Sorkar, u Bah Metbah ula ong “Ngi don hangne ban jam shakhmat bad ban iadonlang bad u Myntri Rangbah bad ban pynbteng ia ka jingiaid lynti ka MDA-2”.

Haba kylli halor ki daw ka jingweng noh ia ki arngut ki Myntri, u Bah Metbah ula ong “Kam don daw eiei ruh em haba weng iano iano, ka dei beit tangka jingiasam lang ia ka jingkitkhlieh bad nga sngew b aka dei ka lynti kaba dei kat kum ka jingsngew jong nga kaba la pynpaw ruh da baroh ki MLA bad ka party baroh kawei”.

Ula pynshai shuh shuh ba kam shym la don satia kano kano ka jingiateh kular halor ka jingiasam ia ka jingkitkhlieh hadien arsnem shiteng.

“Ngim ju don kano kano ka jingiateh kular, pat ju don ha ki snem bala leit noh ruh, kumta kam long kaba donkam ban don ia ka jingiateh kular” ula bynrap.

U Bah Metbah ula ban jur ba ka UDP ka dei ka party ba iatylli bad kan iai bteng ban long kumta.

U Bah Metbah ula batai baka rai ban bujli ia ka Kynhun Myntri ka dei kaba la shim hadien ka jingia syllok bad baroh ki kynhun, kynthup ki MLA, MDC bad ki nongkitkam ka party.

“Nga la kren shai bha ba kane ka dei ka jingpynsngew bad ka jingai jingmut jong baroh ki kynhun jong ka party, naduh ki MLA, MDC, ki Nongkitkam, bad baroh kila iamynjur lang” ula bynrap.

Haba kylli halor ka jingjah u Bah Paul Lyngdoh ha ka jingialang bam smai, u Bah Metbah ula ong ba u Bah Paul u don ia katto katne ki kam ba u hap ban pyndep namar ka dei ka sngi ba khatduh jong u kum u Myntri Sorkar.

“Mynta ka sngi ka dei ka sngi ba khatduh ia u kum u Myntri, ki don katto katne ki kam ba u hap ban pyndep, kumta u khlem lah ban wan sha ka jingialang bam smai” batai u Bah Metbah.