Iatehlok ka Meghalaya bad ka kompani Japan ban pynkhlain ia ka jingpynioh kam ia ki samla

Shillong, Nailur 16: Ka Meghalaya State Skill Development Society (MSSDS), ka tnat Labour, ha ryngkat ka jingiatreilang bad ka Japan International Corporation of Welfare Services, ki la pynlong ia ka Shigoto Seminar ha Bharat Scouts and Guides Auditorium Shillong.

Ka thong jong ka Shigoto Seminar kadei ban kyntiew ïa ki prokram ai kam iaki samla shabar ka ri India.

Haka seminar la iathir halor ka jingdon kam ha Japan, kum haki jaka sumar bad kiwei kiwei ki company ha kaba ka Sorkar Jylla ka la iawer aiki Nursing College ban iashim bynta.

Naka liang u , Executive Director ka MSSDS u Jagdish Chelani u la ong, ba kane ka seminar ka dei ka rynsan ban ai ïa ki nongïashim bynta, ka jingshemphang shaphang ka Kaigo Market kaab don ha Japan.

“Katba phi dang wad jingtip shaphang ki lad ki lynti kiba ka Japan ka lah ban ai, phi dei ruh ban khmih lynti ïa ka jingïakren kaba phin sa lah ban don bad ki nongwan, tip ym tang shaphang ka ri hynrei shaphang ki paidbah. Ka jait kolshor treikam kaba ki don ka la pynlong ïa ka Japan kumba ka long mynta” la ong u Chelani.

Haba pynshlur ïa ki nongiashim bynta haka seminar, u Chelani ula ong “Ngi kyrmen ba ngin ailad ïa phi ban pynkhreh ïalade bad ban wan biang ha kano kano ka por ba phi kwah. To long kiba shlur ban wad bniah lada phi don kino kino ki jingkylli, sngewbha kylli”.

Naka liang u CEO ka NIHON Edutech Pvt Ltd u Krishnan Narayanan haka jingkren u la ong, “Ka JICWELS ka dei ka seng kaba kyrshan ïa ki briew kiba dei ki nongtrei nongsumar. Ka jingdon jong ki hangne kadei ban batai kumno ki nong India na ka thaiñ shatei lammihngi ki la leit sha Japan bad kaei ka jingshem jong ki. Ka ai ïa phi khyndiat ka jingshemphang kumno ka long ka kam, ka jingim bad ka jingmyntoi kaab ki ioh haba trei sha Japan”.
U Narayan ula bynrap daka ba ong “Ki don ki jait kam bapher bapher bad ym tang ka jingsumar bad ki don ki eksamin ban wad nongtrei kiba tbit na India”.

U Hiroya Yaguchi u Director ka JICWELS u pynithuh ia ki nongiashim bynta shaphang ka ‘Kaigo’ lane ka jingsumar, kaba dei baroh shaphang ka jingsumar ia ki briew kiba la kham rangbah ha Japan.

U la ong, “Ka thong jong ngi ka long ban kyrshan ïa ki nongtrei sumar nongpang na abr ri, ngi kyntiew ruh ïa ka jingsumar nongpang ha Japan. Ka imlang sahlang kaba la tymmen ka dei ka mat kaba kongsan bha, bad ngi donkam ïa ki nongsumar. Ka Japan ka dei ka imlang sahlang kaba la tymmen, kaba don ka jinghiar ka jingkha khun. Hynrei, namar ka jingbun briew kaba la nang tymmen bad ka jinghiar ka jingkha khun, ki nong Japan ki nang hiar. Yn donkam 250,000 ngut ki nongtrei sumar ha u snem 2026, kumta dei na kane ka daw ba ka Japan ka wad ïa ki nongtrei sumar nongpang na shabar ri”.

U la bynrap da ba ong “Hynrei na ka bynta jong phi ki bym sngewtynnad ia ka kam ha Kaigo, ki don kiwei pat ki lad ioh kam kiab pynbiang ruh ki jaka sah”.

Ha kane ka seminar la don ruh ka jingia kylli jingkylli ha kaba ki nongiashim bynta ki la iakynduh bad ki riew shemphang ban ioh jingpynshai lada ki dang sngew artatien.