Shillong, Nailur 13: U Myntri Rangbah ka jylla Conrad K Sangma u la pynpaw ia ka jingsngewlem halor ka jingkhlad noh jong u Myntri Rangbah barim ka jylla Dr DD Lapang.
U Sangma u la niew ia u Dr Lapang kum u “riewkhraw” bad u “nongialam uba radbah” uba la noh synniang shibun eh sha ka roi ka par jong ka jylla.
“Ka dei ka jingduh kaba khraw ym tang ia ka Jylla hynrei ia nga shimet ruh ka dei ka jingduh kaba khraw….ha ka jingim kum u nongialam sain pyrthei, ula leh shibun kiei kiei na ka bynta ka Jylla, shibun eh na ka bynta ki briew jongngi bad kumba nga ong, nga ruh nga la ioh shibun ki jinghikai na u, nga ju peit bha ia baroh ki kam b aula leh bad ki dei ki jingai mynsiem kaba khraw ia nga” ula ong haba pynpaw ia ka jingsngewlem sha ki bahaiing hasem bad duwai ba kin ioh ia ka bor ban kit ia kane ka jingduh.
U Conrad ula iathuh ba ula iakynduh ia u Dr Lapang tang 10 sngi shuwa ba un leit shah sumar ha Hospital bad ilyngngoh ba u don ia ka jingmut jingpyrkhat kaba shai bad ka jinglong phikir.
U Myntri Rangbah ula iathuh khana ruh ia ka jingiadei shimet jong u bad u Dr Lapang, naduh ba u ia kynduh kum u Khynnah ha u snem 1988 ha ka por ba u Kpa jong u, Purno A Sangma, u dang long Myntri Rangbah. U kynmaw ia ki synniang u Dr Lapang ia ka Jylla kaba long ka jingai mynsiem ia u ha ka kam sain pyrthei.
Ka Sorkar Jylla kala pynbna haduh lai sngi kum ka sngi sngewsih, bad pynsangeh lut ia baroh ki jing lehkmen bad ki prokram bah eh.
Ka jingleit ontep da ka Jylla ne State Funeral kan long ha ka sngi Nyngkong ha ka por 1 baje nohphai sngi, ka ban sdang da ka jingduwai ha Iingsah u Dr Lapang ha ka por 10 baje mynstep.
Haba pynkynmaw ia ka synniang kum u Chief Adviser ka Sorkar Meghalaya, u Conrad ula iaroh ia ka jingaiti lut jong u Dr Lapang bad ka jingshimkhia ia ka kam bala bynshet, wat hapdeng ka jingnoh ka rta.
U Myntri Rangbah ula iathuh ba u Dr Lapang u long uba shimkhia bha ha ka ban ai jingmut bad jing kyrshan, ha kaba bun sien u ju phone lane phah jing thoh ban iakren ia ki mat ba kongsan bad ban iasam ia ka jingshemphang jong u. U Conrad ula pynpaw ia ka jingsngewnguh ia ki jingai syllok u Dr Lapang, haba kubur ia ka jingshongdor ia ka Sorkar.
“Bun ki briew ki sngew ba ka dei tang ka kyrdan ba nga la ai na ka bynta ban aikam ia u hynrei u Sir ula shimkhia bha ia ka kam bala bynshet. Haba don kano kano ka kynrum kynram ha ka sain pyrthei ne kino kino ki kam, u ju shimkhia ban phone ia nga, u ju phah jingthoh sha nga ban pynpaw ba kane ka dei kaei kaba u sngew halor kata kata ka kam. U dei uba trei smat bha bad u shim khia bha ia ka kam. Nga ai khublei ia u na ka bynta ki jingtbin lynti bad jingkyrshan ba ula ai ia nga”.
