Shillong, Nailur 13: U Dr Donwa Dethwelson Lapang, ba ju iakhot ieid kum u “Maheh” la kha ha ka 10 tarik Iaiong, 1933, ha ka Longiing Khristan jong u (L) Donwas War bad (L) Elsibon Lapang. Ula heh la san bad lai ngut ki para kynthei bad arngut ki para shynrang ha Umsning, Ri-Bhoi District. Ka jingim Khynnah jong u ka dap da ki jingeh bad ka jingialeh, ka jinglong kaba pynwandur ia ka jingim jong u ha ka jingshakri paidbah kaba jrong bad ba phylla.
Ka jingim khynnah bad ka pule dangle:
U Dr Lapang ula pyndep ia ka jingpule skul primary ha Umsning bad pyndep ia ka matric na Shillong Government High School. Ula iai bteng ia ka jingpule jong u da kaba leit klas janmiet ha St. Anthony’s College, Shillong. Wat hapdeng ki jingeh, ula trei khlem shongthait ban kyrshan iala ka iing ka sem, ban iarap ia ki Kmie iba buh dukan sha ha Iew Mawlong (Nongpoh) bad Iew Umsning, nalor ka jingleit trei bylla surok.
Hadien, ula shakri kum u Nonghikai ha Saiden Basic School, Nongpoh haduh san snem, shuwa ba un rung kam ha ka Tnad Forest ka Assam kum u Typist. Nangne ula iai bteng ka jingkiew kyrdan bad shakri kum u Lower Division Assistant, Upper Division Assistant ha Assam Civil Secretariat, bad kham hadien kum u Sub-Inspector of School haduh 10 snem.
Ha u snem 1958, ula iapoi kurim bad I Kong Amethyst Lynda Jomes Blah, bad ryngkat lang, kila don arngut ki Khun. Namar ka jingktah jur haba iohi ia ka jingaiti jong I Kmie ha ka jingngeit, u Dr Lapang u long u Khristan bala aiti lut ialade, bad la tip ia u kum u nongkren ba stad la ka long kum u nongialam ne kum u nongkren paidbah.
Ka jingim kum u riew sain pyrthei:
Ka jingim u Dr Lapang kum u riewsain pyrthei kala ioh mynsiem na ka jingiakhih Hill State, kaba lam sha ka jingpynkha ia ka Meghalaya ha u snem 1972. Ula iatreilang ryngkat ryngkat bad ki riewkhraw ka Jylla kum u Prof GG Swell, Capt W.A Sangma, Bah BB Lyngdoh, Bah Hoping Stone Lyngdoh, Bah PR Kyndiat, Bah DD Pugh bad Bah PG Marbaniang nalor kiwei kiwei.
Ha ka elekshon Assembly ba nyngkong eh ka Jylla ha u snem 1972, u Dr Lapang ula ieng iakhun na Nongpoh Constituency kum u kyrtong shimet bad ula jop. Kane ka jingjop jong u ka dei ka jingsdang jong ka kam sain pyrthei ba pawnam kaba la neh haduh sawphew snem. Ula shah jied biang kum u MLA la bun sien-ha u 1978, 1983, 1988, 1998, 2003, 2008 bad 2013.
U Dr Lapang ula shakri kum u Myntri Rangbah ka Meghalaya haduh san sien, kaba pynioh ia ka nam kum u nongsynshar ri uba tbit bad ba shemphang. Kawei na ki jingjop ba khraw eh jong u, ka dei ka jingpynkha ia ka Ri-Bhoi District ha u snem 1992 nalor kiwei kiwei.
Ula mihkhmat ruh ia ka Meghalaya wat shabar ka Ri, ban ialam ia ka kynhun na Jylla sha ki Ri ka pyrthei kynthup sha USSR, USA, UK, France, Switzerland, Germany, Italy, China, Hong Kong, Singapore, Thailand bad Bangladesh.
Shuwa ban long u Myntri Rangbah ka Jylla, u Dr Lapang ula bat ruh ia bun ki kyrdan ha ka jinglong MLA ba kynthup- 1983-1985 kum u Myntri ka Planning, Finance, Home, Revenue, Food & Civil Supply. 1985-1986 kum u Myntri ka Finance (kynthup ka Taxation, Planning, Evaluation, Home (kynthup ka Passport) bad Revenue. 1986-1987 – Myntri ka Tnad Finance (kynthup ka Taxation), Planning, Evaluation, bad Home (kynthup ka Passport). 1987- 1988 – Myntri ka Tnad Planning and Programme Implementation, 1987-1988 – Myntri ka Tnad Home, Revenue bad Excise bad 1988- 1990 – kum u Deputy Chief Minister ka Tnad Home.
Ki jingioh jingithuh bad Khusnam :
Ki jingnoh synniang u Dr Lapang, kum u Nongialam bad u Nongsynshar Khristan, la ioh jingithuh hapoh ka Ri bad ki bar Ri ruh kumjuh. Napdeng ki jingioh burom kiba bun jong u ki long:
1.Doctorate of Divinity – Acts Academy of Higher Education jong ka International Council of Higher Education, Bangalore (7 January 2004).
2.Mother Teresa Smriti Puraskar Award – World Human Services Society, Vishwa Manav Seva Samity, Kolkata (25 February 2004).
3.Doctorate of Divinity (Honoris Causa) – Serampore College, West Bengal (11 February 2007).
4.Doctorate Degree in Philosophy – Sam Higginbottom Institute of Agriculture, Technology & Sciences University, Allahabad (9 April 2009).
5.Rising Personalities of India and Gold Medal Award – International Penguin Publishing House, New Delhi (8 August 2009).
6.Doctorate of Letters (Honoris Causa) – University of Science & Technology, Meghalaya (10 April 2017).
 Donwas War bad (L) Elsibon Lapang. Ula heh la san bad lai ngut ki para kynthei bad arngut ki para shynrang ha Umsning, Ri-Bhoi District. Ka jingim Khynnah jong u ka dap da ki jingeh bad ka jingialeh, ka jinglong kaba pynwandur ia ka jingim jong u ha ka jingshakri paidbah kaba jrong bad ba phylla.){kind=link}